DILI, o6 jullu 2022 (TATOLI) – Foinsa’e 26 husi munisípiu 12 inklui Rejiaun autonoma espesiál Oe-cusse Ambeno (RAEOA), ho apoiu husi Sekretáriu Estadu juventude no desportu (SEJD), sai benefisiáriu ba formasaun ospitalidade husi ETDA (East Timor Development Agency) atu prepara sira bele fornese serbisu no presta servisu ho kualidade iha área ospitalidade.
Foinsa’e sira ne’e, kada munisípiu ida reprezenta ema na’in rua, hafoin ultrapasa teste aptidaun no numerásia inklui prosesu selesaun seluk ho ‘rigór’, iha ETDA, Dili.
Tanba ne’e, foinsa’e 26 sei partisipasaun atividade formasaun iha ETDA durante fulan tolu; hahú ohin, no sei ramata iha outubru.
“ETDA hahú oinsá mak atu priense lakuña hirak ne’e hodi dezenvolve programa sira ne’ebé hakbiit joven sira,” Diretór ETDA, Januario Neto Mok, hateten, iha abertura formasaun, iha salaun formasaun ETDA, Fatuhada-Dili, kuarta ne’e.
“Hanesan sentru formasaun ninia komitmentu maka harii, atu forma estudante sira atu tama iha atividade hodi partisipa iha dezenvolvimentu Timor-Leste nian no muda sira-nia aan agora ba moris ne’ebé di’ak liu. Oinsá prepara rekursu umanu hodi partisipa iha dezenvolvimentu iha rai-laran, bele aplika serbisu iha fatin seluk,” Ezekutivu ne’e hatutan.
Tuir Diretór ETDA, antes formasaun, joven sira ne’ebé elijível liuhusi prosesu rekrutamentu ne’ebé mak fahe ba faze tolu; primeiru, anúnsia bolsa formasaun ba públiku hafoin kandidatu ne’ebé rejistu hamutuk ema 586. Faze daruak mak halo selesaun dokumentu no ema 386 mak liu no tama ba faze entrevista no tuir teste aptidaun no númerasia nian nune’e selesionadu mak ema 26 ne’ebé daudaun ne’e tuir ona formasaun ospitalidade refere.
“Formasaun ne’e hahú tiha ona iha horseik ne’ebé parte husi ETDA fó-koñesimentu báziku ba formandu sira,” nia haktuir.
Iha fatin hanesan, Diretór Nasionál Kriatividade Juventude, Sekretáriu Estadu juventude no desportu (SEJD), Cesarino da Silva, informa katak kada tinan SEJD oferese formasaun idéntika ka hanesan ba joven timoroan sira.
Iha tinan kotuk, hahú ho joven 40 maibé ninia prosesu lahanesan tanba tinan kotuk ne’e husu rekomendasaun husi sentru juventude ida-idak iha munisípiu; rekomenda ema na’in haat kada munisípiu nune’e tinan ida ne’e muda ninia mekanizmu hakarak loke ba públiku: ema hotu asesu no joven sira bele kompete.
Notísia relevante:SEJD fasilita joven 40 tuir formasaun hospitalidade iha ETDA
“Fundu ne’ebé SEJD fó hodi apoiu ba programa refere ho montante orsamentu $31.875 (trinta e um mil oito centos e setenta e cinco),” Diretór Cesarino da Silva informa, hodi hatan pergunta husi TATOLI, depois abertura programa formasaun.
Benefisiáriu progarama, Cecilia Tilman Barreto, husi munisípiu Dili sente orgullu ho bolsa ne’e tanba, tuir nia, bele ajuda nia iha futuru, hodi hetan serbisu ne’ebé di’ak.
Nia garante katak, esperiénsia ne’ebé sei hetan, bele ba implementa iha komunidade no espera bele kria duni serbisu ba sira-nia aan atu nune’e bele ajuda sira-nia moris.
“Ha’u-nia komitment (kompromisu) mak serbisu maka’as hodi bele remata ha’u-nia bolsa ida ne’e tanba ida ne’e hanesan oportunidade di’ak tebes,” Cecilia Tilman Barreto hateten ba jornalista sira.
Enkuantu, formasaun fulan tolu ne’e, depois konklui, formandu sira sei aprezenta sira-nia Planu negósiu ba SEJD no SEJD sei haree fali sira ninia planu negósiu ba futuru, hodi kontinua reforsa nafatin sira-nia atividade sira liuhusi apoiu, hanesan fundu ki’ik-oan ba sira para oinsá ba harii sira-nia negósiu ka sira-nia atividade iha sira ida-idak nia munisípiu.
Iha tinan kotuk formandu sira ne’ebé ramata ona formasaun, SEJD orienta sira ba asesu fundu ida hanaran ‘Estimulu Emprendedorizmu Sosiál’.
Entretantu, atividade abertura programa formasaun ospitalidade ba foinsa’e 26, partisipa husi reprezentante SEJD, David Tomas Ribeiro, Diretora INDMO, Isabel Fernandes de Lima, Diretór nasionál kriatividade juventude, Cesarino da Silva no Diretór jerál SEJD inklui Diretór ETDA rasik, Januario Neto Mok.
Notísia relevante:Formandu 40 asina termu referénsia ho ETDA molok ba estájiu profisionál
Jornalista: José Belarmino de Sá
Editór: Rafy Belo
