COVALIMA, INKLUZAUN SOSIÁL

Levantamentu dadus: komunidade 1,126 iha Covalima afetadu ba dezastre naturál

Levantamentu dadus: komunidade 1,126 iha Covalima afetadu ba dezastre naturál

Inundasaun akontese iha aldeia Lo’o, suku Suai Loro, postu administrative Suai, Munisípiu Covalima, iha sesta (30 juñu 2022). Imajen Tatoli/Celestina Teles.

COVALIMA, 08 jullu 2022 (TATOLI)—Governu liuhosi Ekipa Komisaun Jestaun Risku Dezastre Naturál (KJRDN) finaliza ona halo lavantamentu dadus ba vítima afetadu dezastre naturál iha munisípiu Covalima.

Notóisia Relevante: Governu apoiu nesesidade bázika ba dadur 118 iha prizaun Covalima

Rezultadu ekipa halo lavantamentu dadus ba vítima inundasaun iha munisípiu Covalima, populasaun hamutuk 1,126 mak afetadu ba dezastre naturál no hosi númeru ne’e feto na’in-521 no mane na’in 605 ho totál xefe família 376.

Administradòr Munisípiu Covalima, Francisco de Andrade, akompañdu hosi ekipa jestaun risku Dezastre Naturál fó sai rezultadu levantamentu dadus va vítima inundasaun iha Covalima. Imajen Tatoli/Celestina Teles.

“Hafoin akontesimentu inundasaun ita-nia Ekipa Komisaun Jestaun Risku Dezastre Naturál (KJRDN) halo levantamentu dadus ba vítima inundasaun iha Covalima hamutuk 1,126 ho xefe família hamutuk 376,” Administradór Munisípiu Covalima, Francisco de Andrade, fó sai dadus vítima dezastre naturál iha Covalima, iha nia knar fatin, kinta ne’e.

Vítima inundasaun sira-ne’e hosi postu administrativu postu administrativu Suai iha suku Suai Loro iha aldeia Akar-Laran, Lo’o no Mane-ikun, suku Beco iha aldeia Aidantuik no postu administrativu Tilomar iha suku Lalawa, aldeia Ai-oan ne’ebé ho tipu dezastre bee tama komunidade nia uma.

Aleinde iha suku Ogues, postu administrativu Maucatar no suku Labarai iha postu administrativu Suai hamutuk uma tolu ne’ebé mak kondisaun uma aat totál ne’ebé afetadu hosi inundasaun, nune’e presiza materiál rekuperasaun.

Maske ekipa dezastre naturál foti ona dadus iha postu Suai no Tilomar, maibé sira seluk seidauk foti hanesan postu Maucatar haree liu-ba infraestrutura, estrada kotu entre Maucatar mai Suai no estrada liga hosi Maucatar ba Fatululik no Lolotoe kotu ne’ebé seidauk iha dadus.

Relasiona ho akontese udan boot durante loron tolu tama ba loron haat iha sesta (30/6), komunidade afetadu inundasaun ne’ebé ho tipu bee-tama komunidade nia uma no balun to’o uma monu naksobu.

Durante vítima inundasaun iha sentru evakuasaun hetan apoiu hosi Ministru Obra Públika, Abel da Silva Pires, apoiu osan $500.00, deputadu Alexandrino Cardoso, Diretora Servisu Saúde Covalima, Prezidente Repúblika liuhosi xefe kaza sivil, líder Nasionál Kay Rala Xanana Gusmão, CVTL no partidu FRETILIN rasik fó apoiu nesesidade bazika ne’ebé balun distribui ona ba família vítima sira no balun sei rai iha armajen.

Antes ne’e, iha sesta (01/07), Xefe Departamentu Operasaun Emerjensia Servisu Munisipál Jestaun Risku Dezastre Naturál, José Fátima Xavier, informa Ekipa Servisu Munisipál Jestaun Risku Dezastre Naturál, Protesaun Sivil hamutuk ho parseiru Cruz Vermelha Timor-Leste (CVTL), Word Vision no Mercy Corps tun ona ba terrenu hodi halo levantamentu  dadus komunidade ne’ebé  afetadu ba inundasaun  iha munisípiu Covalima.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!