BOBONARO, EKONOMIA, HEADLINE, MUNISÍPIU

Komunidade Tapo-Memo husu Governu kria lei separa rai produtivu-konstrusaun

Komunidade Tapo-Memo husu Governu kria lei separa rai produtivu-konstrusaun

Komunidade sira fakar ona rai-henek ho fatuk iha natar área soso, suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 15 julu 2022 (TATOLI) – Xefe suku Tapo-Memo, postu administrativu Maliana, munisípiu Bobonaro, Joaquim Baptista, reprezenta povu husu ba VIII Governu Konstituisionál atu kria lei ida hodi separa rai produtiva ba agrikultura no rai atu halo konstrusaun ba dezenvolvimentu.

Nia hato’o kesaun ne’e ba Vise-Primeiru Ministru, Ministru Planu no Ordenamentu, José Maria dos Reis, iha atividade konsulta públiku kona-ba planu munisipál ordenamentu territóriu ne’ebé realiza iha Jináziu Maliana, munisípiu Bobonaro, sesta ne’e.

Notísia relevante: CAFI sei aprova estrada urbana Maliana ho kilómetru 23

Joaquim levanta kestaun ne’e tanba iha empreza balun hahú fakar fatuk no rai-henek konstrusaun ba estasaun kombustível no uma iha natar pertense área Soso to’o ba cabang Memo, postu administrativu Maliana.

“Ha’u-nia povu husu ba na’i ulun sira halo lei ida, hafahe terrenu produtivu ba agrikultura no terrenu ne’ebé mak atu halo konstrusaun ba dezenvolvimentu, maibé tenke ho Lei, labele ho ibun de’it, tanba ami lideransa komunitária laiha kbiit,” nia tenik.

Xefe suku ne’e mós uza ona podér nu’udar lideransa komunitária konsege halo intervensaun ba empreza ne’ebé halo konstrusaun iha área refere, maibé laiha baze legál ruma atu reforsa intervensaun ne’e.

“Karik ema levanta kestaun ne’e ba tribunál, tanba interese komún, hodi ha’u ba tribunál  karik oinsá,” nia karesenta.

Eis Administrador Munisípiu Bobonaro, Domingos dos Santos, reforsa Maliana nu’udar kapitál munisípiu dezde tempu portugés to’o okupasaun  Indonézia koñesida ho naran ‘lumbung padi’ maibe agora nakfilak sai fatuk no konstrusaun ne’ebé nakonu ho uma.

“Ida-ne’e aban bainrua atu sai saida mós ita la hatene, ne’e mak ha’u atu hatete ba Vise-Primeiru Ministru, ita hanoin lisuk ho konsultór sira atu define loloos rai estadu mak ne’ebé, rai governu mak ida-ne’ebé, konsulta didi’ak iha kraik, sé lae aban bainrua konsultór sira fila ami ho ami mak haan malu,” nia hateten.

Hatán ba kestaun ne’e, Vise Primeiru Ministru, Ministru Planu no Ordenamentu, José Maria dos Reis, esklarese governu la’ós atu sukat komunidade nia rai, maibé Diresaun Nasional Terra no Propriedade maki ha kompeténsia liu.

“Rai ne’e iha potensialidade ba natar karik, ida-ne’e fó ba natar, ida-ne’e atu halo uma nian karik fó ba uma nian, ne’ebé aban bainrua iha ordenamentu mak orsida ita sei hatudu ba ita, hanesan ita sa’e mai natar sira halo fali estasaun kumbustível natar sira-ne’e ba hotu uma, tanba ida-ne’e mak levantamentu munisipál atu hateten loloos ita halo dezenvolvimentu ne’e iha-ne’ebé,” nia esplika.

Munisípiu Bobonaro iha suku 50 no postu administartivu neen, komposta hosi Atabae, Balibo, Cailaco, Maliana, Bobonaro no Lolotoe, ho totál populasaun 97,762 kompostu hosi mane 48,875 no feto 48,887 ho totál uma-kain 17,675.

Notísia relevante: Irrigasaun Maliana II la funsiona, Natar Soso nakonu ho fatuk no rai-henek

Jornalista   : Sérgio da Cruz

Editór         : Evaristo Soares Martins

iklan
iklan

One Comment

  1. Nu’udar sidadaun, liuliu nu’udar Bobonaro oan, preokupa ho saida maka ita haree daudaun iha rai produtivu iha área Soso nian ba kraik. Ha’u apresia ho intervensaun ne’ebé maka autoridade lokál iha-ne’ebá halo hodi impede temporariamente atividade konstrusaun nian maske la kaer ba baze legál ruma. Ita lamenta ho ema sira-ne’ebé ita bolu emprezáriu sira-ne’e, nu’usá la buka fatin seluk? Ita apresia ho sira-nia inisiativa atu halo investimentu, maibé karik atu uza fali terenu produtivu sira hanesan ne’e, di’ak liu investe iha área ne’ebé ligadu bá agrikultura.

Leave a Reply

iklan
error: Content is protected !!