iklan

JUSTISA, COVALIMA, HEADLINE, MUNISÍPIU

Mákina avaria, Notariadu Covalima seidauk prodús sertidaun nascimentu   

Mákina avaria, Notariadu Covalima seidauk prodús sertidaun nascimentu   

Ministru Justisa, Tiago Amaral Sarmento, halo vizita traballu ba iha edifísiu Terra no Propridade no Serbisu Kadastrál Munisípiu Covalima. Imjaen/ Natalino Costa.

COVALIMA, 15 jullu 2022 (TATOLI)— Diretór Servisu Rejistu no Notariadu Munisipiu Covalima, António Sarmento, hateten durante ne’e sira la halo atendimentu ba komunidade ne’ebé presiza sertidaun nascimentu tanba mákina avaria.

“Ba parte atendimentu pasaporte iha ne’e kada loron ami atende de’it ema na’in-rua no ba iha parte atendimentu sertidaun nascimentu ami ladauk halo produsaun tanba mákina avaria hela,” Diretór Servisu Rejistu Notariadu Munisipiu Covalima, hateten bainhira Ministru Justisa, Tiago Amaral Sarmento halo vizita traballu ba fatin refere, iha sesta foin lalais ne’e.

Alende ne’e, nia dehan problema seluk ne’ebé enfreta mak notariadu Covalima laiha fatin arkivu atu rai dokumentu sira, nune’e dokumentu hirak ne’e aruma iha rai-de’it.

“Ami nian kondisaun fatin serbisu maka ne’e, durante ne’e ami atu rai dokumentu arkivu sira la di’ak tanba laiha fatin, tanba ne’e ami rai arquivu sira ne’e tau iha rai de’it,” Diretór ne’e afirma.

Hataan ba preokupasaun ne’e, Ministru Justisa, Tiago Amaral Sarmento, orienta ba ekipa tékniku ministériu nia atu solusiona kestaun ne’e iha tempu badak atu atendimentu serbisu ba sidadaun sira kontinua la’o ho di’ak.

“Ha’u orienta ona atu ekipa tékniku sira rezolve lalais kestaun ne’e atu atedimentu ba produsaun sertidaun Nascimentu bele la’o di’ak,” Ministru Tiago kompromete.

Alende ne’e, Governante mós orienta Diretór Servisu Rejistu no Notariadu Munisipiu Covalima, atu buka rai hodi konstrui uma ida sai hanesan fatin ba konservasaun dokumentu no arquivu sira.

“Ministériu Justisa maka hanesan Ministériu ne’ebé kontrola rai no uma Estadu, maibé ita laiha fatin atu rai dokumentu arquivu sira ne’e defisil tebes, nune’e ha’u orienta ita boot identifika rai hodi bele halo uma sai hanesan fatin ida espesiál hodi konserva ita nian dokumentu no arquivu sira. Ita tenke kuidadu labele tau iha rai,” Governante ne’e orienta.

Notísia relevante:MJ orienta Terra no Propriedade Covalima obriga empreza selu arrendamentu

Jornalista: Natalino Costa

Editór      : Florencio Miranda Ximenes

iklan
iklan

Leave a Reply

iklan
error: Content is protected !!