iklan

EKONOMIA, HEADLINE

Governu aprova tetu agregadu OJE 2023 biliaun $1,8

Governu aprova tetu agregadu OJE 2023 biliaun $1,8

Primeiru-Ministru, Taur Matan Ruak prezide Reuniaun extraordinária Konsellu Ministru. iha Palásiu Governu, segunda (18/07). Imajen Tatoli /Egas Cristóvão

DILI, 18 jullu 2022 (TATOLI)–Governu liuhosi reuniaun Konsellu Ministru (KM) estraordinária, kuarta ne’e, aprova tetu agregadu Orsamentu Jerál Estadu (OJE) 2023 ba Administrasaun Sentrál ho montante biliaun $1,8.

“Konsellu Ministru estraórdináriu halo aprovasaun ba montante totál despeza ba kada títilu orsamentál tinan 2023, hafoin iha loron hirak tuir mai maka sei halo diskusaun tékniku filafali atu iha montante finál,” Ministru Prezidénsia Konsellu Ministru, Fidelis Manuel Leite Magalhães, relata, hafoin ramata reuniaun ezekutivu ne’e, iha Palásiu Governu, kuarta kalan.

Notísia relevante: Governu realiza jornada orsamentál hodi konkretiza medida Lei GOP 2023

Tetu Agregadu biliaun $1,8 ne’e esklui ona Fundu Kombatente Libertasaun Nasionál (FKLN) biliaun $1, Orsamentu Seguransa Sosiál millaun $235,7 no Rejiaun Administrativa Espesiál Oé-cusse Ambeno (RAEOA) millaun $120.

Nune’e, totál despesa globál ba OJE 2023 mak biliaun $3,15.

“Biliaun $3 ne’e la’ós atu sai hotu, maibé ne’e inklui ona biliaun $1 ba fundu veteranu, atu efeitu kontabilístiku kada tinan ne’e, biliaun $1 tenki temi hela de’it tanba ne’e biliaun $1 ita tau sees tiha hodi rezerva hela ba veteranu sira. Despeza ne’ebé sei uza ba tinan oin ne’e besik biliaun $2,” nia akresenta.

Portavós Governu esplika, iha Lei Grande Opsaun Planu (GOP) estabelese ona katak montante despeza globál ba 2023 hamutuk biliaun $3,155.

Orsamentu ne’e sei uza hodi finansia programa 45 liuhosi atividades prinsipál 275, organizadu iha área estratéjiku 16 ne’ebé Governu sei foku ba iha tinan oin hanesan agrikultura, pekuária, peska no floresta, ekonomia no empregu, turizmu, dezenvolvimentu rurál no abitasaun, ambiente, petróleu no minerál, eletrisidade no enerjia renovável, konektividade nasionál, bee no saneamentu, edukasaun no formasaun, saúde, inkluzaun no protesaun sosiál, kultura no patrimóniu, reforma Estadu, defeza no seguransa nasionál, relasaun internasionál no polítika esterna.

Aleinde ne’e, distribuisaun tetu agregadu orsamentu Administrasaun Sentrál iha OJE 2023 bazeia ba setór importante sira iha Planu Estratéjiku Dezenvolvimentu, ba setór enkuadramentu institusionál hetan alokasaun 38%, tuir kedan ho kapitál sosiál 33%, dezenvolvimentu infraestrutura 22% no dezenvolvimentu ekonómiku 7%.

Ho aprovasaun ne’e, Ministériu Finansa sei fó sai sirkulár kona-ba regra elaborasaun OJE 2023 no distribui envelope fiskál aprovadu ba entidade Estadu hamutuk 109 ne’ebé mak hola parte iha perímetru orsamentál 2023.

Ba oin, KM mós sei aprova alokasaun orsamentu tuir programa no Proposta Projetu Lei (PPL) OJE 2023 no sei konklui ho entrega PPL OJE 2023 ba Parlamentu Nasionál iha fulan-outubru atu hetan aprovasaun molok haruka ba Prezidente Repúblika atu tetu iha tinan ida-ne’e nia rohan.

Kalendáriu ne’e tuir ona espíritu lei foun Enkuadramentu Orsamentál ne’ebé mak promulga ona iha fulan-fevereiru liubá, ne’ebé lei estruturante ne’e sai nu’udar baze ida ba Reforma Jestaun Finanseira Públika.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!