DILI, 18 jullu 2022 (TATOLI)–Governu liuhosi Diresaun Nasionál Empregu Exteriór (DNEE) hosi Sekretaria Estadu Formasaun Profisionál no Empregu (SEFOPE), segunda ne’e, desloka tan traballadór timor-oan na’in-110 bá serbisu iha Koreia Súl, iha área fábrika 23 no peska 87.
“Ohin loloos ita-nia traballadór atu bá Koreia Súl hamutuk na’in-111, maibé tanba na’in-ida detetadu pozitivu COVID-19, entaun kansela la bá,” Diretór Nasionál Empregu Exteriór, Filomeno Soares, hateten iha Aeroportu internasionál Prezidente Nicolau Lobato, Comoro.
Notísia relevante: PR Horta husu traballadór timoroan dixiplina no kumpre lei Korea do Súl
Diretór ne’e husu ba traballadór ne’ebé la konsege arranka ohin, atu koopera nafatin ho ekipa saúde atu halo tratamentu intensivu, nune’e bele rekupera filafali ho lalais hodi hein oportunidade tuir mai.
“Ha’u husu mós ba traballadór na’in-110 ne’ebé ohin hetan ona oportunidade bá serbisu iha Koreia Súl, atu hatudu komportamentu di’ak no labele halai sees hosi sistema, hodi nune’e empregadór sira bele emprega tan joven timor-oan barak ne’ebé hein hela oportunidade serbisu,” nia akresenta.
Hahú hosi tinan 2009 to’o 2022, traballadór ne’ebé bá serbisu ona iha Koreia Súl hamutuk 4.523.
“Hosi númeru sira ne’e, sees hosi sistema hamutuk 400 resin, maibé sira ne’e kontribui nafatin osan mai ita-nia rai. Maski nune’e ita fó hanoin nafatin ba sira atu labele monu ba risku no tau-an ba risku,” nia tenik.
Jornalista : Arminda Fonseca
Editora : Julia Chatarina
