PR Horta husu traballadór timoroan dixiplina no kumpre lei Korea do Súl
DILI, 15 jullu 2022 (TATOLI)—Prezidente Repúblika (PR), José Ramos Horta, husu traballadór timoroan na’in 111 atu kumpre lei Korea do Súl nian no hatudu dixiplina iha servisu.
Notísia Relevante: Durante tinan 11, traballadór timor-oan serbisu iha Korea Súl 3.696
“Boaviajen, servisu di’ak ba imi hotu. Ha’u-nia mensajen mak imi ba iha ne’eba kumpre lei no kultura Korea do Sul nian no dixiplina iha servisu hotu aproveita tempu ho didi’ak, lalika gasta osan arbiru, labele gasta osan hodi joga, rai didi’ak osan hadi’a ekonómia família, selu oan sira-nia eskola. Imi ne’ebé sei joven, ba iha ne’eba, se bele aproveita estuda on-line, tanba iha ne’eba estuda online di’ak loos,” PR Horta hato’o nia mensajen bainhira partisipa serimónia asina deklarasaun entre SEFOPE ho família traballadór timor-oan na’in 111 ne’ebé sei dezloka ba Korea do Sul, iha salaun Timor Lodge, Comoro, Dili, sedta ne’e.
Xefe Estadu ne’e konsidera traballadór timoroan hirak ne’e sei sai embaixadór Timor-Leste iha Korea do Sul tanba ba reprezenta nasaun, nune’e presiza hatudu komportamentu di’ak iha sosiedade no servisu sira, nune’e ema estranjeiru bele admira no manán konfiansa liután.
Horta hateten, traballadór timoroan ba servisu iha rai-li’ur ne’e normál hodi bele hadi’a ekonómia família no nasaun.
“Ema balun dehan timoroan barak mak agora sai hotu ba servisu iha rai-li’ur ne’e ladi’ak maibé ha’u hanoin ida-ne’e normál ba servisu iha rai-li’ur hanesan imi atu ba Korea do Sul. Tanba fenómenu iha mundu ema juta ba juta iha mundu tomak ba rai seluk hala’o servisu ne’ebé hatama osan boot ba ekonómia,” nia hateten.
Nune’e, Xefe Estadu fó apoiu tomak ba Sekretária Estadu Formasaun Profisionál Empregu (SEFOPE) tau orsamentu oinsá kapasita joven sira iha formasaun tékniku hodi prepara ba servisu iha rai seluk.
“Ha’u sempre apoiu SEFOPE tau osan formasaun tékniku iha Timor, ajuda eskola formasaun tékniku, hanesan Fatumaca no sentru formasaun sira no kúrrikulu presiza tuir nivél ho internasionál hanesan Korea do Sul ka Austrália nian,” nia hateten.
Tanba ne’e, presiza apoiu joven sira maibé ba li’ur tenke organizadu liuhosi SEFOPE ka ajénsia sira-ne’ebé koopera ho SEFOPE, nune’e ikus labele mosu problema ka difikuldade oioin no oinsá garante seguransa vida.
Laureadu Novel ba Páz ne’e hateten iha tempu oin mai sei hala’o vizita ba Korea do Sul hodi hametin liután relasaun Timor-Leste ho Korea do Sul.
“Korea do Sul nasaun ida ha’u kuñese di’ak, to’o aproxima simpatia ha’u ko’alia ho sira konsege haruka traballadór timoroan dahuluk ema na’in-50 no to’o ohin loron aumenta atus ba atus. Nune’e, iha tempu di’ak, tinan ne’e nia laran ha’u sei ba vizita Korea do Sul buka hametin liután relasaun Timor-Leste ho Korea do Sul, ko’alia oinsa instituisaun Korea mai iha ne’e no komérsiu produtu Koreanu mai iha ne’e no ema Korea barak mai iha ne’e,” nia hateten.
Notísia Relevante: Janeiru-juñu 2022, traballadór timor-oan 595 serbisu iha Koreia Súl
Jornalista : Nelson de Sousa
Editór : Cancio Ximenes
