COVALIMA, INKLUZAUN SOSIÁL

Komunidade aldeia Biata seidauk asesu eletrisidade

Komunidade aldeia Biata seidauk asesu eletrisidade

Tékniku EDTL, E.P hadi’a instalasaun liña eletrisidade iha área Colmera, Dili, segunda (25/10). Imajen TATOLI/António Gonçalves.

COVALIMA, 18 jullu 2022 (TATOLI)–Xefe Suku Fatuleto, João Freitas, informa komunidade aldeia Biata, suku Fatu-Leto, postu administrativu Zumalai, munisípiu Covalima seidauk asesu eletrisidade.

“Ha’u-nia komunidade suku Fatuleto falta aldeia Biata mak to’o ohin loron seidauk asesu ba liña eletrisidade, nune’e ha’u-nia komunidade sei moris iha nakukun laran, maske aldeia sira seluk asesu ona,” João Freitas hateten ba Agência Tatoli iha resintu Administrasaun Munisipál Covalima, Sukaer-Laran, segunda ne’e.

Daudaun ne’e, komunidade iha aldea refere uza de’it lampu tradisionál (mina-rai), nune’e difikulta tebes komunidade atu asesu ba informasaun no estudante sira atu estuda iha tempu kalan ne’e susar tebes.

Maske xefe suku rasik hato’o ona problema ne’e ba iha autoridade no to’o iha nasionál maibé to’o ohin loron seidauk iha rezultadu, nune’e komunidade kontinua moris iha nakukun laran.

Aleinde komunidade la asesu eletrisidade, komunidade mós seidauk asesu ba estrada públiku no mós estrada liga hosi suku ba aldeia sira, nune’e komunidade sira hola inisiativa kee rasik estrada.

“Ha’u-nia komunidade ho inisiativa kee rasik estrada, nune’e transporte públiku no privadu bele halo movimentu maibé estrada ne’ebé mak komuniadade rasik kee ne’e bainhira tempu udan naksobu fali,” nia dehan.

Kondisaun estrada aat difikulta komunidade atu halo movimentu hodi faan sira-nia produtu lokál iha merkadu atu sustensaun nesesidade uma laran.

Suku Fatu-Leto kompostu hosi aldeia Biata, Colu, Fatuleto Canua, Nalaop
no  Zobete ho nia populasaun hamutuk 2 079 ho xefe família 605.

Antes ne’e, iha loron 12 fulan-maiu tinan ne’e, Administradór Postu Zumalai, Rui dos Santos hateten, komunidade postu Zumalai, uku suku Lour, Mape Usecai no Fatuleto mak seidauk asesu ba estrada no eletrisidade.

Jornalista : Celestina Teles

Editór       : Cancio Ximenes

iklan
iklan

Leave a Reply

iklan
error: Content is protected !!