iklan

NASIONÁL, MUNISÍPIU, POLÍTIKA

CCLN-SASCAS sei atribui osan ba grupu veteranu halo atividade ekonomia

CCLN-SASCAS sei atribui osan ba grupu veteranu halo atividade ekonomia

Prezidente Konselu Kombatente Libertasaun Nasionál (CCLN, sigla portugés), Vidal de Jesus Riak Leman. Imajen Tatoli/Celestina Teles.

DILI, 19 jullu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidal de Jesus ‘Riak Leman’, informa iha fulan-jullu ne’e Governu liuhosi SASCAS sei atribui osan ba grupu veteran grau 0-3 no 4-7 hodi halo atividade ekonómia.

Notísia Relevante: SASCAS no CCLN selebra akordu tau-matan ba grupu veteranu

“Durante ita enkontru ho Servisu Apoiu Sosiedade Sivil no Auditória Sosiál (SASCAS) ne’e, Governu liuhosi SASCAS sei atribui osan ba grupu veteranu grau 0-3 no 4-7 hodi halo atividade  ekonómia atu fó benefísia ba ita-nia maluk veteranu ne’ebé la hetan pensaun kada fulan ne’e,” Riak Leman hateten ba Agência TATOLI, iha nia kna’ar fatin Comoro, Dili, tersa ne’e.

Prezidente CCLN ne’e hateten, planu ne’e CCLN mak inisia tanba haree ba realidade veteranu grau 0-3 no 4-7 la hetan benefísiu ka la simu subsídiu hosi Estadu kada fulan.

“Ha’u rasik ko’alia ho Primeiru-Ministru, Taur Matan Ruak hodi oinsá buka meiu ka planu ida oinsá veteranu ne’ebé la hetan benefísiu, ita bele apoiu osan naton ruma hodi bele sustenta família nia moris ka hasa’e rendimentu ekonómia liuhosi apoiu osan naton,” Riak Leman hateten.

Maibé, nia dehan, osan ida-ne’e liuhosi SASCAS mak atribui ba grupu veteranu sira iha Munisípiu, nune’e fulan ne’e sei atribui depois mak ekipa hosi parte rua ne’e halo monitorizasaun ba atividade refere.

Enkuantu, programa ne’e ninia alvu loloos mak veteranu sira-ne’ebé ho ninia kategoria dedikasaun grau 0-3 no 4-7, nune’e programa ne’e realiza hafoin diskusaun entre dirijente parte rua iha tinan 2021.

Nia dehan, grupu hosi CCLN munisípiu sira submete hotu ona proposta ne’ebé fulan ne’e bele atribui ona osan, nune’e programa ne’e bele realiza.

Koordenadór SASCAS, Filipe da Costa, hateten program apoiu grupu veteranu ne’e sei implementa hosi SASCAS no sei kolabora ho CCLN tanba ne’e parte rua ne’e presiza servisu hamutuk.

“Asinatura akordu ne’e atu fasilita ami halo sensibilizsaun programa ne’e hamutuk, selesaun proposta, monitorizasau, avaliasaun no supervizaun hamutuk, ne’ebé programa ne’e sei hala’o iha territóriu tomak no CCLN nível munisípiu mak sei tulun organiza grupu no organizasaun sira, inklui sei halo akompañamentu ba implementasaun atividade kada munisipiu,” nia hateten.

Tuir planu, sei iha projetu ida iha kada munisípiu ida inklui atividade sira hanesan edukasaun ne’ebé bele fó subsídiu ba veteranu dedikasaun 0-3 no 4-7 sira-nia oan ba eskola no atividade ekonomia ne’ebé apoiu ba agrikultura, atividade indústria transformasaun ai-han no indústria artezenatu sira, ne’ebé iha proposta laran sei inklui mós fundu ruma ba atividade operasaun.

“Projetu ne’e ninia objetivu mak atu garante asesu edukasaun ba veteranu grau 0-3 no 4-7 ninia oan-sira kria oportunidade hetan rendimentu uma-kain ba veteranu 0-3 no 4-7 sira.

Notísia Relevante: CCLN sei fó $20,000 ba veteranu grau 0-3 kria grupu buka moris

Jornalista : Osória Marques

Editór        : Cancio Ximenes

iklan
iklan

Leave a Reply

iklan
error: Content is protected !!