DNTT lansa voucher kombustível ba transporte públiku Viqueque semana oin

VIQUEQUE, 19 jullu 2022 (TATOLI)–Diretór Servisu Diresaun Nasionál Transporte Terrestre (DNTT) munisípiu Viqueque, Elvino da Cruz, informa, DNTT sei lansa voucher subsídiu kombustível ba transporte públiku sira munisípiu Viqueque, semana oin.

“Ha’u lori ona voucher kombustível mai ona iha munisípiu Viqueque. Nune’e iha semana oin, ita hahú halo lansamentu hodi distribui kupon mina ba ita-nia transporte públiku sira,” Diretór informa ba Agência Tatoli, iha ninia knaar fatin, tersa ne’e.

Notísia relevante: Transporte rodoviáriu públiku 3.871 sei sai benefisiáriu subsídiu kombustível

Atividade ne’e sei lansa hosi Administradór no akompaña hosi komadante Polísia Nasionál Timor-Leste (PNTL) munisípiu Viqueque.

“Kritériu hetan subsídiu kombustível ba transporte rodoviáriu iha munisípiu Viqueque depende ba rejistu, hanesan transporte diresaun hosi Viqueque ba postu sei simu iha Viqueque, maibé diresaun Dili mai Viqueque sei simu subsídiu iha Dili. Lista  transporte sira ne’ebé rejista iha Viqueque ne’e ami prepara hotu ona no hein halo lansamentu de’it,” nia akresenta.

Inisiativa ne’e bazeia ba dekretu-lei númeru 18/2022 loron 19 abril, ne’ebé prevee atribuisaun kombustível ba operadór transporte rodoviáriu públiku, operadór aéreu no marítima nasionál.

Subsídu ba transporte públiku hanesan bus sei simu voucher tahan tolu, ne’ebé kada tahan ida ho montante $50, nune’e fulan-ida ho totál $150, konta ba mina litru 150, ne’ebé sei oferese durante fulan-tolu.

“Ita-nia Governu prepara kupon ba bus $50, transporte públiku angguna ho mikrolet sei simu voucher $20 tahan 7, aumenta kupon $1 ho totál litru 150, ba fulan maiu nian. Hafoin juñu no jullu sei simu subsídiu kupon hanesan tanba subsídu ne’e ba fulan-tolu nian bazeia diploma ministériál no dekretu-lei,” nia tenik.

Tuir dadús hosi DNTT, iha munisípiu Viqueque rejista transporte públiku angguna hamutuk 130, bus 42 no mikrolet 15 no transporte públiku hamutuk 87.

Jornalista   : Vitorino Lopes da Costa

Editora       : Julia Chatarina