DILI, 19 jullu 2022 (TATOLI)–Ministériu Edukasaun Juventude no Desportu (MEJD) deside ona totál númeru fiksu profesór voluntáriu hamutuk 470 mak sei apoiu programa eskola iha uma.
“Ami identifika ona aldeia iha Dili laran ne’e hamutuk 222. Ami-nia planu sei koloka profesór iha kada aldeia iha profesór voluntáriu na’in-rua. Ita-nia estimasaun sei prepara profesór hamutuk 444, maibé ita sei aumenta tan númeru to’o 470,” Diretór Jerál Administrasaun no Finansa MEJD, Antoninho Pires, informa iha edifísiu MEJD, Vila Verde, tersa ne’e.
Notísia relevante: MEJD rekruta profesór voluntáriu 500 apoiu programa eskola iha uma
Nia dehan, vagatura hamutuk 470 ne’ebé MEJD loke hanesan providénsia ba profesór voluntáriu iha Dili de’it, hahú hosi prodesór 800 to’o 900, ne’ebé identifikadu ona no vaga ne’e rasik ministériu loke hodi fó liu prioridade ba profesór sira ne’ebé mak hanorin iha ensinu pré-eskolár no ensinu báziku.
“Ha’u hanoin profesór voluntáriu sira ne’ebé ita presiza atu apoiu atividade eskola iha uma ne’e sei la prejudika tanba prosesu rekrutamentu ne’e ita halo de’it ba sira ne’ebé voluntáriu iha munisípiu Dili. Dadus ne’ebé ita iha kuaze profesór hamutuk 500 to’o 600 resin, maibé ami presiza de’it 470,” nia akresenta.
Tuir Ministru, profesór voluntáriu sira bainhira hetan ona kontratu atu apoiu programa eskola iha uma mak sei la hamosu preokupasaun iha fatin anteriór ne’ebé sira hanorin.
“Sira ne’e eskola mak rekruta, maibé bainhira ministériu presiza laiha problema tanba sira-nia estatutu seidauk loos, ne’ebé ministériu tenke fó kontratu ba sira atubele hala’o sira-nia knaar iha aldeia sira,” governante ne’e tenik.
Nune’e, bainhira programa ne’e realiza ona maka MEJD sei koloka ekipa ida hodi halo supervizaun hamutuk ho inspetór eskolár sira ba atividade eskola iha uma no relatóriu hosi atividade ne’e tenke submete kada fulan ba ministériu tanba programa ne’e konsidera hanesan pilotu.
Jornalista : Tomé Amado
Editora : Julia Chatarina
