EDUKASAUN, HEADLINE

MEJD sei distribui livru millaun rua eskola iha territóriu nasionál

MEJD sei distribui livru millaun rua eskola iha territóriu nasionál

Ministru Edukasaun Joventude no Desportu, Armindo Maia. Imajen Tatoli/Francisco Sony

DILI, 19 jullu 2022 (TATOLI)–Ministériu Edukasaun Juventude no Desportu (MEJD) tempu besik sei halo distribuisaun livru hamutuk millaun rua ba eskola iha territóriu nasionál.

“Ami foin daudaun ne’e simu tan livru hamutuk millaun 2, livru sira ne’e sei iha hela prosesu verifikasaun depois kuandu ramata ona maka ami sei prepara hodi halo distribuisaun ba eskola sira iha territóriu nasionál,” Ministru Edukasaun Juventude no Desportu, Armindo Maia, relata iha serimónia tau fatuk dahuluk ba konstrusaun biblioteka nasionál, iha Hudi-laran, Fatuhada, tersa ne’e.

Ministru dehan, MEJD hetan apoiu livru hosi parseiru dezenvolvimentu ho kuantidade boot, tanba ne’e ministériu asegura hela iha armazen hodi halo uluk verifikasaun hodi identifika livru matéria saida maka parseiru fornese, hafoin ministériu sei koloka tuir nesesidade.

Notísia relevante: UNESCO entrega livru 90.108 ba MEJD responde aprendizajen durante pandemia

Maski MEJD seidauk verifika, maibé tuir Ministru livru ne’e sei distribui barak liu ba ensinu báziku no ba ensinu sekundáriu sira.

Parte MEJD iha ona planu katak bainhira konstrusaun biblioteka ramata ona, sei apoiu livru ba biblioteka.

“Bainhira biblioteka nasionál presiza livru ba mestre sira ba hanorin iha eskola sira, konserteza ita sei tau exemplár to’o 100 hanesan ne’e atu mestre no estudante sira bele mai aproveita lee,” nia tenik.

Jornalista   : Tomé Amado

Editora        : Julia Chatarina

iklan
iklan

Leave a Reply

iklan
error: Content is protected !!