DILI, 19 jullu 2022 (TATOLI)–Ministru Obra Públika (MOP), Abel da Silva Pires, hateten, prosesu konkursu públiku ba estrada Laga-Baguia no Waiaka-Quelecai, munisípiu Baucau ramata ona, nune’e semana oin sei anunsia rezultadu.
“Prosesu konkursu ramata no taka ona prosesu selesaun, hein katak fulan oin bele iha ona kompañia ne’ebé manán ba projetu estrada Laga-Baguia no Waiaka-Quelecai,” Ministru relata iha Palásiu Governu, kuarta ne’e.
Notísia relevante: CNA loke ona konkursu ba projetu estrada Laga-Baguia no Quelicai-Ossu
Governante ne’e dehan, daudaun ekipa sira rezolve hela indemnizasaun no hala’o hela reuniaun ho autoridade lokál munisípiu Baucau.
“Indemnizasaun ne’e parte integradu hosi prosesu hotu. Ekipa boot ida daudaun iha Baucau hodi hala’o enkontru ho autoridade sira kona-ba prosesu indemnizasaun ba projetu estrada,” nia akresenta.
Ekipa identifika populasaun oituan mak afetatadu ba projetu konstrusaun estrasaun Laga-Baguia.
“Uma hitu mak afetadu ba projetu estrada Laga-Baguia, maibé Waiaca-Baguia mak barak tanba estrada luan. Ita hotu hatene komunidade iha Quelecai barak, tanba ne’e uma barak mak sei afetadu maibé ho haraik-aan husu apoiu komunidade tanba idan-e’e ba sira-nia di’ak,” nia tenik.
Antes ne’e, MOP prevee ona orsamentu ba indemnizasaun projetu estrada ne’e ho montante millaun $3.
Jornalista : Antónia Gusmão
Editora : Julia Chatarina