PNTL detein ona suspeitu taa abitante ida iha Uatulari
VIQUEQUE, 19 jullu 2022 (TATOLI)—Polísia Nasionál Timor Leste (PNTL) munisípiu Viqueque daudaun ne’e detein ona suspeitu ida tama sela Eskuadra PNTL postu Uatulari, ne’ebé deskonfia komete kazu taa abitante ida iha postu Uatulari.
“Daudaun ami detein hela ema na’in-ida ba sela Eskuadra PNTL postu Uatulari. Prosesu tuir mai sei kontinua halo investigasaun profunda ba suspeitu hodi bele hatene loloos, maibé ami sei halo prosesu identifikasaun no deklarasaun, hafoin haree mudansa tuir mai,” Komadante PNTL munisípiu Viqueque, Supertendente Polísia, Sebastião Alves Quintão, informa ba Agência Tatoli, iha Kuartel PNTL, Beskem, Viqueque, tersa ne’e.
Notísia relevante: Ema deskoñesidu taa pasajeiru ida iha Uatulari
Ohin loron maizumenus tuku 13:00 meiu dia, membru Polísia Uatulari hamutuk ho task force munisípiu Viqueque kaptura suspeitu.
Kazu ne’e akontese iha loron 18 jullu 2022 maizumenus tuku 00:56, ne’ebé suspeitu taa abitante ida iha área Uaidae baliza ho suku Uaitame no Matahoi, postu uatulari, munisípiu Viqueque.
Nune’e, konsidera kazu ne’e hanesan asaltu no tentativa omesidu tanba suspeitu falun oin metin no taa vítima nia liman kabun kotuk parte loos to’o kanek boot.
Jornalista : Vitorino Lopes da Costa
Editora : Julia Chatarina
