iklan

EDUKASAUN, HEADLINE

Diretór Belun: “Uma-lisan mak identidade kulturál”

Diretór Belun: “Uma-lisan mak identidade kulturál”

Uma-lisan Bortai. Foto TATOLI: Felicidade Ximenes

DILI, 20 jullu 2022 (TATOLI) – Diretór Belun, Luis da Costa Ximenes, hateten, prezervasaun uma-lisan ne’e papél importante liuliu promove nafatin oinsá jerasaun foun sira bele nafatin hatene no ema sira iha nasaun seluk bele koñese.

“Uma-lisan mak identidade kulturál, eziste kedan iha ita-nia beiala sira la’o to’o mai agora maske ita hasoru dezáfiu ho kolonializmu sira, maibé depois ukun aan ita kontinua reorganiza, rearmoniza ita-nia lisan. Kulturál ida ne’e iha ida-idak ninia knua, iha ida-idak nia fatin. Ida ne’e hodi hatudu ba rai-laran no mós ba rai-li’ur katak ida ne’e mak Timór nia patrióniu kulturál,” Diretór Luis da Costa Ximenes  hateten ba Tatoli, kuarta ne’e.

Diretór ne’e salienta, jerasaun hotu esforsu ba atu iha era globalizasaun ne’e labele hamate lisan no tradisaun orijinál Timór ninia. “Oinsá maka rekursu tradisaun sira ne’e ita bele konserva ho di’ak dezenvolve nafatin ba oin hodi adapta ho di’ak globalizasaun mundu ho teknólojia sira ne’ebé mak agora avansadu”.

“Identidade kulturál ne’e mantein ho ita-nia identidade hodi hatudu katak tipu ka modelu uma-lisan ida hanesan ne’e husi fatin ka knu’a iha munisípiu ida ne’e ho ninia dezeñu oinsá ne’e, hodi hatudu didi’ak ba iha ne’ebá, atu nia orijinál ema labele kopia. Ita presiza dezenvolve ho didi’ak orijinalidade uma-lisan hodi lahalakon ninia valór motif sira ho ninia identidade sira ne’ebé prezerva ona husi tempu beiala sira nian mai to’o agora,” nia énfaze.

Nia hatutan: “Se ita mak halo mudansa bo’ot la uza ona ai, du’ut manlai, tali-metan no hotu-hotu uza blok keramik de’it kalen sira ne’ebé kór oi-oin ne’e ha’u hanoin la’os ona hatudu ita-nia identidade ne’e hamenus ona nia valór”.

Ezekutivu ne’e mós husu ba Governu no komunidade hotu atu halo meiu oinsá kuda ai, tali-metan no promove, prezerva ai-horis sira hodi apoiu reabilitasaun uma-lisan iha Timor ninia orijinalidade nafatin eziste.

“Ida ne’e mak dezafiu ida ba ita oinsá ita kontinua kuda, kontinua prezerva, kontinua haburas, ai no rikeza natureza sira ne’e para aban-bainrua ne’e nia bele la’o nafatin ba oin. Dala ida tan, ha’u husu atu labele halakon ninia valór orijinál sira ne’e maibé mantein no kontinua ba iha valór ne’ebé bei-ala sira husik hela oinsá ita atu kontinua dezenvolve ba oin,” nia afirma.

Labele halakon uma-lisan ninia orjinál

Diretór Belun, Luis da Costa Ximenes, esplika katak liuhusi uma-lisan hametin unidade família no matak-malirin ba jerasaun sira.  “Husi unidade uma-lisan ne’e mak hametin ita-nia relasaun, ita-nia unidade família nomós fó matak-malirin husi uma-lisan nian mai iha ita atu proteze ita iha ne’ebé de’it ita iha”.

Diretór ne’e senti orgullu ho programa ne’ebé implementa husi Guvernu tanba koko atu mantein orijinalidade uma-lisan iha territóriu laran.

Tuir nia, Uma-lisan lamantein nia orijinalidade mak lafurak ona. “Sekretáriu arte i kultura ho ninia polítika ida daudaun suport ba iha uma-lisan sira, ne’ebé balun la’o ona, balun agora kontinua la’o ona iha munisípiu, postu, suku ka knua ida-idak labele halakon Uma-lisan ninia orjinál, tanba kuandu halakon ninia orjinál ema haree hanesan lafurak ona ne’e iha mudansa bo’ot, maske ita iha era ida globál, hotu-hotu ho internet, hotu-hotu ho informasaun oioin maibé ita-nia kultura ne’e nafatin”.

Entretantu, Belun hanesan organizasaun lokál estabelese iha tinan 2004 ho ninia programa importante sira alvu ba komunidade benefisiáriu ba programa atividade implementa ba iha komunidade, ho ninia atividade hanesan formasaun no mós halo peskiza, dezenvolvimentu kapasidade komunidade inklui advokásia.

 

Notísia relevante:Uma-lisan importante, “Presiza proteje”

Jornalista: José Belarmino de Sá

Editór: Rafy Belo

iklan
iklan

Leave a Reply

iklan
error: Content is protected !!