DILI, 20 jullu 2022 (TATOLI)–Grupu peskizadór hosi Institutu Politékniku Betano (IPB) simu dadus karau Timor mate iha postu administrativu Same vila tanba impaktu hosi lumbriga, nune’e ekipa foti ona amostra hodi halo diagnóstika iha laboratóriu.
“Ita iha grupu peskiza ida hosi IPB ne’ebé daudaun ne’e halo hela identifikasaun ba tipu trematoda fasciola no fasiola hepatika ne’ebé durante ne’e hamate karau Timor iha Same,” Xefe Departamentu Siénsia Ezata no Siénsia Naturál iha Institutu Nasionál Siénsia Teknolojia (INCT, sigla portugés), Gregorio Rangel, informa ba Agência Tatoli, iha edifísiu INCT Balide, kuarta ne’e.
Notísia relevante: UNTL peskiza duut fó nutrisaun ba karau
Grupu peskiza ne’e agora rekolla hela karau nia teen atu halo diagnóstika iha laboratóriu.
“Dadus ne’ebé INCT rekolla hosi karau na’in sira iha terrenu, hateten katak karau Timor sira ne’e hafoin moris mai liu fulan-rua mate no molok mate mosu sintoma hanesan bubu iha karau nia kakorok, kabun no isin sira seluk. Kuandu karau na’in sira ko’a haree iha karau nia aten ne’e kuaze lumbriga mak nakonu,” nia akresenta.
Atividade peskiza ne’e agora halo hela iha aldeia Loti, suku Dai-sua, postu administrativu Same vila, munisípiu Manufahi.
Peskizadór sira foti hela amostra hodi kontinua halo diagnóstika iha laboratóriu atu identifika tipu moras ne’ebé afeta karau sira ne’e mate.
“Espera iha fulan hirak tuir mai peskizadór sira sei halo aprezentasaun rezultadu preliminária atubele hatene sá tipu maka afeta ba karau iha Same vila mate hela de’it,” nia tenik.
Jornalista : Tomé Amado
Editora : Julia Chatarina
