BOBONARO, EKONOMIA, HEADLINE, MUNISÍPIU

Ohin, transporte públiku Bobonaro simu subsídiu kombustível

Ohin, transporte públiku Bobonaro simu subsídiu kombustível

Diretór Transporte Terrestre Munisípiu Bobonaro, José Paulo Henriques Baptista. Imajen Tatoli/Sérgio da Cruz.

BOBONARO, 20 jullu 2022 (TATOLI) – Ohin, Ministériu Transporte no Komunikasaun liuhosi Diresaun Transporte no Terrestre Munisípiu Bobonaro, distribui subsídiu kombustível ba transporte públiku hamutuk 52.

Ministériu Transporte no Komunikasaun Sosiál liuhosi Diresaun Transporte Terrestre Munisípiu Bobonaro (DTT) distribui bazea ba Dekretu-Lei númeru 18/2022, 19 abríl no diploma ministeriál númeru 0576/MTC/IV/2022, 29 abríl 2022 hodi atribui voucer kombustível ba transporte bís Autocarro diresaun Dili ba Maliana hamutuk 21, anguna 31 no mikrolete 10.

Notísia relevante: Transporte rodoviáriu públiku 3.871 sei sai benefisiáriu subsídiu kombustível

“Ami hahú distribui voucer subsídiu kombustível ba benefisiáriu hamutuk 52 ne’ebé mak ativu hela tula pasajeiru no dokumentu válidu hela, komesa hosi dadeer tuku 08:00 to’o 12:00, depois ida-ne’e komesa fali iha tuku 14:00 to’o tuku 17:00 lokraik,”  Diretór Transporte Terrestre Munisípiu Bobonaro, José Paulo Henriques Baptista imforma ba Jornalista Tatoli, iha kna’ar-fatin, tersa ne’e.

Nia esplika, prosesu atu asesu subsídiu ne’e transporte públiku sira sei ba foti voucer iha edifísiu DTT Bobonaro, Soso, Maliana.

Hafoin ne’e motorista sira sei lori direita ba iha estasaun kombustível rua ne’ebé governu kontrata ona hanesan Abonkase unipesoál Lda iha Holsa no Gracia Silva Unipesoál Lda iha Rai-mean, suku Raifun.

Maibé daudaun ne’e DTT Bobonaro kontinua halo atendimentu ba transporte públiku sira-ne’ebé seidauk rejista atu asesu direitu ba subsídiu ne’e, maibé tenke kumpri prosedimentu sira hanesan, dukumentu lisensa tenke válidu.

“Ita distribui subsídiu ne’ebé transporte públiku sira kada fulan sei hetan litru 150. Ba sira-ne’ebé dokumentu mate no la ativu halo atendimentu sei la hetan direitu ba subsídiu ne’ebé governu distribui,” nia fó hanoin ba motorista sira.

Responsávell DTT munisípiu ne’e apela ba emprezáriu transporte públiku no motorista sira kumpre data ne’ebé mak governu determina ona katak iha etapa dahuluk sei termina iha loron 31 fulan-jullu tinan ne’e.

“Liu data ida-ne’e estasaun kombustível sei la atende, tanba ne’e loron-kuarta bele hakat mai edifísiu Diresaun Transporte Públiku Bobonaro foti ita-boot sira-nia direitu uza tuir ita-boot sira-nia nesesidade hodi halo operasaun,” nia fó hanoin.

Ekipa DTT sei koordena ho Polísia Nasionál Timor-Leste (PNTL) munisípiu Bobonaro liuhosi seksaun Tránzitu, monitorza subsídiu ne’ebé governu distribui inklui halo kontrolu ba tarifa ba pasajeiru sira.

Notísia relevante: PR Lú Olo promulga dekretu-lei subsídiu kombustível

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!