EKONOMIA, HEADLINE

Embaixadora Inês Almeida prefere empreza australiana entrevista direta traballadór

Embaixadora Inês Almeida prefere empreza australiana entrevista direta traballadór

Embaixadora Timor-Leste iha Austrália, Inês Almeida. Imajen Tatoli/Francisco Sony

DILI, 21 jullu 2022 (TATOLI)–Embaixadora Timor-Leste iha Austrália, Inês Almeida, prefere liu empreza australiana halo entrevista direta ba kandidatu traballadór sira ne’ebé atu ba serbisu iha Austrália.

“Sekretaria Estadu Formasaun Profisionál no Empregu (SEFOPE) iha lista traballadór hamutuk 15.000 atu bá Austrália maibé baibain empreza sira mai para halo entrevista, la’ós SEFOPE. Empreza tenke hatene kandidatu traballadór nia abilidade iha lian ingles ita lalais ka lae tanba iha ne’ebá ko’alia kona-ba produtividade, hahú kuda strowberry ka blackberry, to’o ita kuu oinsá mak ita halo serbisu inklui étika serbisu mós tenke di’ak,” Embaixadora hateten, hafoin hasoru Primeiru-Ministru, Taur Matan Ruak, iha Palásiu Governu, kinta ne’e.

Notísia relevante: Empreza Thomas Foods kompromete rekruta timor-oan serbisu iha Austrália

Nia fó ezemplu, to’os na’in sira presiza ema a’as minímu metru 1,48, labele badak liu tanba la konsege kuu aifuan sira ne’ebé a’as, maibé iha mós morangu badak, entaun presiza ema badak.

“Kritériu sira ne’e halo parte hotu, tanba ne’e hanesan demanda katak sira presiza mak sira mai foti, la presiza sira la mai foti. Maibé ita-nia ema sira la kompreende katak tanba iha lista ne’e naruk ona, tama tiha ona, halo tiha ona ezersísiu tenki bá maibé lae, depende ba empreza no depende mós ba komportamentu oinsá komporta se ita bá iha ne’ebá mak ita rungu-ranga malu ema lakohi,” nia akresenta.

Diplomata timor-oan ne’e dehan, agora iha kompetisaun boot liután tanba rai seluk hanesan Vanuatu no Tonga nia ema sira mós badinas.

“Iha Austrália iha mós saláriu mínimu $21,50 kada oras, ne’ebé traballadór sira parese manán osan kada oras entre $25 to’o $26. Kuandu badinas maka sei hetan osan liu ne’e, kuandu la badinas maka fulan tolu de’it sira bele haruka filafali mai, entaun ida-ne’e maka ita tenke kompreende bainhira ita bá serbisu iha Austrália”, nia fó hanoin.

Entretantu, bazeia ba sensu Austrália nian katak, populaaun timor-oan iha Austrália hamutuk 10.670, ne’ebé númeru ne’e la inklui traballadór no estudante.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!