EKONOMIA, HEADLINE, INTERNASIONÁL

Empreza Thomas Foods kompromete rekruta timor-oan serbisu iha Austrália

Empreza Thomas Foods kompromete rekruta timor-oan serbisu iha Austrália

Embaixadora Timor-Leste iha Austrália, Inês Almeida. Imajen Tatoli/Francisco Sony

DILI, 21 jullu 2022 (TATOLI)–Embaixadora Timor-Leste iha Austrália, Inês Almeida, kinta ne’e, lori empreza Thomas Foods Internasional hasoru Primeiru-Ministru (PM), Taur Matan Ruak, hodi halo aprezentasaun no kompromete katak sei rekruta timor-oan hodi bá serbisu iha Austrália.

“Lori empreza Thomas Food International mai hasoru Primeiru-Ministru hodi halo aprezentasaun ida ligadu ho sira-nia fábrika, ne’e empreza boot tebes, sira kada tinan halo lukru biliaun $2, liu ita-nia Orsamentu Jerál Estadu. Sira-nia empreza foku liu ba prosesa na’an bibi-malae no na’an bibi timur, sira nakloke atu investe iha Timor, maibé agora foku liu oinsá lori timor-oan bá serbisu iha sira-nia empreza,” Diplomata timor-oan relata hafoin hasoru malu ho Primeiru-Ministru, iha Palásiu Governu.

Embaixadora haktuir, iha semana tolu liubá bainhira nia bá vizita Adelaide, momentu ne’ebá empreza aprezenta-an no Embaixadora konvida sira mai Timor-Leste.

“Sira disponível no mai duni, ne’e hatudu sira iha vontade. To’o agora seidauk iha traballadór timor-oan ida mak serbisu iha sira-nia fatin, traballadór timor-oan kuandu bá Austrália serbisu iha área aifuan se lae kuda modo. Iha mós traballdór bá serbisu iha fábrika na’an maibé oituan de’it, tanba sira empreza boot maibé laiha timor-oan ida mak serbisu iha sira-nia empreza, agora foin dahuluk sira hakarak timor-oan serbisu,” nia akresenta.

Notísia relevante: Traballadór timor-oan 100 iha Austrália tama ona sistema

Tanba ne’e, empreza hahú rekruta timor-oan na’in-15 liuhosi selesaun no tempu badak sei arranka.

“Sira hato’o ba Primeiru-Ministru katak iha tempu badak sira hakarak mai haree tan oinsá atu rekruta tan timor-oan tanba sira agora presiza traballadór, Austrália agora presiza ema barak atu bá serbisu,” nia subliña

Reprezantente Estadu Timor-Leste iha Austrália ne’e husu ba timor-oan sira ne’ebé hetan oportunidade serbisu iha Austrália atu hatudu duni katak reprezenta Estadu Timor-Leste.

“Ha’u nu’udar xefe misaun, apelu ba timor-oan sira ne’ebé hetan oportunidade, ne’e oportunidade di’ak tebes, hanesan janela ida nakloke ba ita, tanba ne’e tenke hatudu komportamentu no disiplina nu’udar timor-oan tanba ita bá lori ita-nia bandeira RDTL, se ita lori bandeira ne’e ita tenki respeita, katak tenki obedese lei Austrália, tenki iha disiplina bainhira bá serbisu iha ema-nia fatin tanba oportunidade úniku, aban bainrua saida mak akontese bele taka dalan,” nia fó hanoin.

Biban ne’e, Embaixadora apela mós ba traballadór na’in-15, atu iha responsabilidade no tenke hatudu komportamentu no serbisu di’ak.

“Empreza kompromete ona ba Primeiru-Ministru katak sira sei haree traballadór sira ho di’ak no sira sei manán osan ho rate ne’ebé Austrália fó, katak osan di’ak. Agradese tanba ita loke odamatan ba sira atu foti timor-oan ba serbisu iha sira-nia empreza,” nia salienta.

Ba inisiativa ne’e, Xefe Ezekutivu kontente tebes no kompromete katak Governu prontu atu fó asisténsia ba saida de’it maka empreza hakarak halo iha Timor.

Empreza husu traballadór sira la presiza esperiénsia boot tanba molok serbisu sira sei fó uluk formasaun, maski nune’e traballadór sira tenki hatene lian inglés pelu menus báziku no molok arranka sei halo teste médiku.

Jornalista   : Antónia Gusmão

Editora        : Julia Chatarina

iklan
iklan

Leave a Reply

iklan
error: Content is protected !!