DILI, 12 jullu 2022 (TATOLI)—Diretór Nasionál Empregu Exteriór hosi Sekretaria Estadu Formasaun Profisionál no Empregu (SEFOPE), Filomeno Soares, hateten, traballadór timor-oan iha Austrália hamutuk 333 ne’ebé ses hosi sistema, daudaun ne’e na’in-100 tama fali ba sistema kontrolu.
“Sira deside tama sistema tanba dokumentu ne’ebé sira aplika, ema pendente la sai. Ita-nia traballadór timor-oan ne’ebé hahú hosi tinan 2012 to’o agora bá serbisu iha Austrália ne’e hamutuk 5.290, hosi númeru ne’e na’in-333 mak ses hosi sistema, maibé daudaun na’in-100 mak tama fali ona ba sistema,” Diretór informa ba Agência Tatoli, iha ninia knaar fatin, Becora, tersa ne’e.
Notísia relevante: Traballadór timor-oan na’in-24 serbisu iha Austrália liuhosi programa PALM
Traballadór ne’ebé tama ona sistema tanba ho esforsu hosi Governu Timor-Leste hamutuk ho Governu Australia hodi fó hanoin ba sira, tanba bainhira bainhira ses hosi sistema lakon kontrolu, hetan dezastre ruma sei lakon buat hotu hanesan asuránsia ba saúde, no tau-an ba risku tanba la hetan akompañamentu hosi adidu.
“Ita hotu hatene sira ne’ebé ses hosi sitema ne’e la’ós tanba sira-nia hakarak, maibé tanba situasaun mak obriga momentu mosu COVID-19, maibé la tuir dalan, momentu sira ses hosi sistema mak fó hatene ba empregadór sira katak sai temporáriamente no loron ruma sei filafali mai karik di’ak, maibé sira sai loos uza viza protesaun,” nia akresenta.
Tuir Diretór, kestaun ne’e sei risku ba sira, maibé Governu nafatin halo esforsu nune’e traballadór sira bele tama filafali ba sistema.
“Sira ne’ebé daudaun tama fali ba sistema ne’e mós empregadór sira antes ne’e sei haree fali, atu foti sira ka lae, tanba antes ne’e foti sira maibé sai nonok, maibé di’ak tanba sira hakarak tama fali sistema, ho ida-ne’e ami fó hanoin nafatin ba sira ne’ebé foin ba ikus sira ne’e labele ses tan hosi sistema,” nia fó hanoin.
Aleinde ne’e, daudaun iha traballadór timor-oan hamutuk 4.523 mak serbisu iha Koreia Súl, hahú hosi tinan 2009 to’o agora.
“Sira ne’ebé ses hosi sistema hamutuk 400 resin, maibé sira ne’e kontribui nafatin osan mai ita-nia rai. Maski nune’e, ita fó hanoin nafatin ba sira atu labele monu ba risku,” nia dehan.
Jornalista : Arminda Fonseca
Editora : Julia Chatarina
