Akizisaun 10% husi Osaka Gas aumenta partisipasaun Timor GAP ba 66,56%
DILI, 24 Setembru 2026 (TATOLI)—Ministru Petrolíferu no Rekursu Minerál (MPRM), Francisco da Costa Monteiro, informa akizisaun 10% interese partisipasaun Osaka Gas Australia iha Projetu Greater Sunrise sei aumenta partisipasaun Timor GAP, E.P. husi 56,56% ba 66,56%.
“Akizisaun ne’e komersialmente aprovadu ka aseitadu ona entre Timor GAP ho Osaka Gas Australia. Maibé, informasaun kona-ba presu akizisaun seidauk bele fó sai ba públiku,” Francisco da Costa Monteiro hateten ba jornalista sira iha Faról, ohin.
Kona-ba presu hira loos ne’e klaru hanesan ministru hatene, maibé husi akordu ida-ne’e to’o agora daudaun seidauk bele fó hatene lai ba públiku. Entaun, benefísiu husi akizisaun 10% ne’e mak aumenta partisipasaun Timor-Leste iha Projetu Greater Sunrise liuhusi Timor GAP, ne’ebé bele fó espasu boot liután ba Timor-Leste atu influénsia lala’ok projetu, tempu ezekusaun no diskusaun estratéjiku sira.
Nia afirma, iha estrutura Joint Venture, partisipasaun ne’ebé boot liután bele fó oportunidade ba Timor GAP atu iha influénsia boot liután iha prosesu halo desizaun kona-ba asuntu importante sira iha projetu.
“Kona-ba finansiamentu, aumentu partisipasaun husi 56,56% ba 66,56% la’ós aumentu ba risku finanseiru Estadu, maibé aumenta nesesidade finansiamentu husi parte Estadu,” nia dehan.
Nia subline, realidade ne’e presiza tetu ho impaktu pozitivu ne’ebé aumentu partisipasaun bele fó ba projetu.
Kona-ba pipeline Greater Sunrise mai Timor-Leste, esforsu, polítika no preparasaun ne’ebé Governu halo to’o agora fó fiar katak pipeline bele mai Timor-Leste.
Aumentu partisipasaun Timor GAP ba 66,56% sei aumenta liután posibilidade ba pipeline atu mai Timor-Leste.
Jornalista : Felicidade Ximenes
Editór : Cancio Ximenes
