MPRM no PT Taka asina akordu ba investigasaun rota pipeline Greater Sunrise no Bayu-Undan
DILI, 24 Setembru (TATOLI) – Ministériu Petróleu no Rekursu Mineral (MPRM) no empreza PT Taka Hydrocore, husi Indonézia, asina akordu ba realizasaun Light Geotechnical Investigation ba rota pipeline Greater Sunrise no Bayu-Undan mai Timor-Leste.
Ministru Petróleu no Rekursu Minerál, Francisco da Costa Monteiro, hatete akordu ne’e atu kontinua estudu detallu ba investigasaun mariña ne’ebé envolve ró-ahi sira bá foti amostra iha tasi Timór tuir dalan kadoras nian atu mai iha Natarbora.
Nia esplika katak PT Taka sei hala’o atividade diferente ho empreza Fugro Singapore Marine Pte.
“Ne’e sira bolu Light Geotechnical Survey, atu permite kompañia bele halo serbisu durante fulan neen nia laran, depois orsida nia rezultadu mak sei inkorpora filafali ho dezeñu prosede ba finalizasaun fonte LNG ikus mai bele avansa ba konstrusaun”, nia hatete hafoin asina akordu hamutuk ho PT Taka Hydrocore, iha edifísiu MPRM, Faról Dili, ohin.
Akordu Light Geotechnical iha komponente espesífiku ketak ida
peskiza iha tasi laran hodi haree rota kadoras Greater Sunrise no Bayu-Undan. Ministru esplika katak ida-ne’e sei rekolla dadus barak hodi analiza ikus mak bele hatene ninia rota ne’e.
“Di’ak ka la’e, iha risku ruma karik dalan ba kadoras atu liu ne’e, keta iha rai ruma iha poténsia monu karik, sira-nia investigasaun orsida ekipa espesialista sira sei foti fali dadus ne’e hodi analiza filafali, ikus mai hatene katak bele tau pipline iha ne’e”, nia dehan.
Ministru informa katak atividade ne’e finansia ho orsamentu millaun $10-resin.
Iha fatin hanesan, Diretór-Ezekutivu PT Taka, Syukri Fitrialdi, agradese ba Governu, liuhusi MPRM hodi partisipa iha serbisu ne’e iha Timor-Leste. Empreza sei halo peskiza ba rota pipeline ho ekipamentu no serbisu tékniku iha área ee liu metru 3.000.
“Ami iha kompromisu ba pojetu ne’e ho profisionál tanba ne’e importante ba dezenvolvimentu Timor-Leste”, nia afirma.
Empreza ne’e iha esperiénsia tinan 20 iha setór referidu no antes ne’e hala’o atividade hanesan iha nasaun lubun ona.
Notísia relevante: MPRM-Empreza Fugro selebra akordu kona-ba “Heavy Geotechnical Investigation”
Jornalista: Nelson de Sousa
Editora: Maria Auxiliadora
