MPRM-Empreza Fugro selebra akordu kona-ba “Heavy Geotechnical Investigation”
DILI, 24 Setembru (TATOLI)—Ministériu Petróleu no Rekursu Minerál (MPRM) ho Empreza Fugro Singapore Marine Pte, kinta ne’e, selebra akordu ba realizasaun servisu Heavy Geotechnical Investigation no Light Geotechnical Investigation ba rota pipeline Greater Sunrise no Bayu Undan mai Timor-Leste.
Ministru Petróleu no Rekursu Minerál, Francisco da Costa Monteiro, hateten kontratu rua ne’e envolve servisu investigasaun jeotekniku iha tasi, inklui foti amostra husi fundu tasi atu halo análize laboratóriu ba fatin ne’ebé sei tau pipeline.
“Servisu ne’e presiza ekipamentu no navio espesializadu tanba investigasaun sei hala’o iha área tasi,” Francisco da Costa Monteiro dehan ba jornalita sira bainhira ramata asina akordu ho Empreza Fugro Singapore Marine Pte iha Faról, ohin.
Nia dehan, kontratu ne’e hetan liuhusi prosesu aprovizionamentu ne’ebé lidera husi Komisaun Nasionál Aprovizionamentu (CNA), hamutuk ho ekipa MPRM, hodi hili Empreza ne’ebé iha kapasidade atu hala’o servisu ne’e.
Nia hateten, MPRM mós asina kontratu ho Fugro ba servisu jeofíziku iha inísiu tinan 2026, no servisu jeofíziku sei hahú iha fulan-Novembru.
Enkuantu servisu jeotekniku sei hahú iha fulan-Fevereiru 2027, ho implementasaun ba prosesu akizisaun dadus tomak sei lori tempu besik tinan ida.
Iha Fatin hanesan, Diretór Rejionál Fugro ba Negósiu Karáterizasaun Sítios Marinhos iha Ázia-Pasífiku, Safri Drahman, hateten Empreza Fugro no parseiru Governu sira atinje akordu no asina kontratu daruak ba servisu levantamentu tékniku no survey iha futuru.
“Antes ne’e, kontratu dahuluk kona-ba survey jeofíziku mós asina ona iha inísiu tinan 2026. Iha projetu ne’e, Fugro sei uza teknolojia foun ba perfurasaun seafloor drillingatu hala’o servisu tékniku iha área ho profundidade bee liu metro 3.000. Servisu sei kobre pipeline rua ne’ebé liga área Greater Sunrise ho Timor-Leste,” Safri Drahman hateten.
Nia afirma, projetu ne’e sei hahú iha Novembru 2026 ho survey jeofíziku, no kontinua ho survey jeotékniku iha inísiu 2027. Prosesu akizisaun dadus iha kampu tomak sei lori besik tinan ida atu kompleta.
“Ami mós promete katak servisu sei hala’o ho profisionál, seguru no responsável, ho atensaun boot ba protesaun ambiente máritimu durante atividade hotu-hotu,” nia dehan.
Jornalista : Felicidade Ximenes
Editór : Cancio Ximenes
