Deputada PLP husu transparénsia iha prosesu rekrutamentu kadete foun PNTL
DILI, 24 Setembru 2026 (TATOLI) – Deputada husi Bankada Partidu Libertasaun Populár (PLP), Maria Angelina Sarmento Lopes, bolu atensaun Governu atu garante transparénsia iha prosesu rekrutamentu ba membru Polísia Nasionál Timor-Leste (PNTL).
Nia kestiona prosesu transparésia ba rekrutamentu kadete foun, tanba simu informasaun katak kadete balun la prienxe rekizitu, hanesan sira ne’ebé admitidu maibé idade la prienxe rekizitu atu tama no balun admitidu maibé idade la prienxe kritéria.
“Lista barak mak kadete sira ne’e admitidu nia idade liu ona, más sira ne’ebé la admitidu idade prienxe rekizitu. Ida-ne’e signifika komisaun rekrutamentu PNTL nian sei kontinua hela hahalok sira ne’ebé halo iha fulan hirak ba kotuk hodi Primeiru-Ministru hapara tiha prosesu”, nia levanta iha Parlamentu Nasionál, ohin.
Nia husu ba komisaun rekrutamentu tenke tau atensaun hodi hadook aktu sira hanesan favoritizmu no familiarizmu iha prosesu rekrutamentu, hodi fó oportunidade ba foinsa’e sira ne’ebé hakarak sai hanesan polísia.
Antes ne’e, Prezidente Júri ba Konkursu Públiku, Komisáriu Polísia José Soares, informa katak tempu ba kandidatu PNTL atu halo reklamasaun ne’e hahú husi 16 to’o 22 Setembru 2026 hodi kontinua ba prosesu tuirmai.
Komisaun reteste ba rekrutamentu kadete foun PNTL, ne’ebé tuir rezolusaun Governu númeru 15/2026 no rezolusaun númeru 29/2026, ne’e tuir nesesidade Polísia. Uluk vaga 400, depoiz tuirmai aumenta tan 750.
Iha diploma Ministeriál númeru 35/2026, iha artigu 15 hatete katak atu hakat ba ezame tuirmai, dokumentu hothotu ne’ebé submete iha konkursu tenke halo reavaliasaun hotu ba dokumentu ne’ebé hatama.
José dehan Estadu ne’e hakarak promove méritu, iha transparénsia, iha integridade, laiha diskriminasaun no iha kredibilidade.
“Ita hakarak promove buat loos. Ida-ne’e maka ita hakarak. Ne’ebé, hamutuk ho ha’u ita hatudu rekrutamentu ne’ebé di’ak. Ha’u hakarak defende ema hotu”, José Soares hatete.
Kona-ba idade boot ne’ebé kontinua pasa iha reteste ne’e, nia hatán, uluk rejistu ne’e ho manuál, maibé agora uza sistema no iha ne’ebá ema nia naran, eskolaridade, ne’ebé mai ho diploma pré-sekundáriu, mai ho sertifikadu pasajen (keterangan lulus) ne’e sistema deteta kedas.
Notísia relevante: https://tatoli.tl/2026/09/21/ohin-tempu-ba-kandidatu-pntl-halo-reklamasaun-ramata/
Jornalista: Nelson de Sousa
Editora: Maria Auxiliadora
