Presu simente iha Vikeke kada saka sa’e ona bá $6
VIKEKE, 24 Setembru 2026 (TATOLI)—Xefe Suku Karaubalu, Postu Administrativu Vikeke Vila, Munisípiu Vikeke, João Pinto, informa presu simente kada saka agora daudaun negosiante loja sira fa’an iha Postu Vikeke Vila ho presu sa’e ona bá $6.00.
“Kona-ba presu simente iha Munisípiu Vikeke Vila, uluk negosiante Xinés sira fa’an kada saka ho folin $4.50 no $5, maibé agora folin sa’e tiha bá $6.00. Entaun, difikulta komunidade halo uma no mós ba ami-nia obra Programa Nasionál Dezenvolvimentu Suku (PDNS) 2026 liuliu ba implementasaun estrada sirtu betaun tanba uza simente mak cor, ne’ebé presiza simente barak liu,” João Pinto ba TATOLI iha Postu Vikeke Vila, Kinta ne’e.
Autoridade Suku Karaubalu ne’e subliña presu simente sa’e ne’e fó impaktu maka’as liubá fornesedór sira-ne’ebé hatama simente fabrikadu ba estrada betaun ne’ebé implementa iha Suku Karaubalu, tanba iha kuotasaun ne’e empreza fornesedór tau simente nia presu ne’e $5,25.
“Maibé, agora folin simente sa’e fó impaktu ba fornesedór sira. Iha ha’u-nia suku ita-nia fornesedór simente ba estrada betaun metru 400, horisehik hatama ona karta reziganasaun tanba folin simente sa’e maka’as loos. Ami-nia estrada betaun ne’ebé agora konstrui hela ne’e presiza simente saka 3.000. Agora simente laiha, ne’ebé ami-nia servisu paradu hela,” nia haktuir.
João dehan Autoridade Suku agora daudaun buka dalan atu koordena fornesedór simente hodi fornese simente ba programa PNDS atu konklui obra ne’e, se la’e obra referida labele konklui razaun folin simente sa’e.
“Orsamentu PNDS ba tinan ida-ne’e aloka mai Suku Karaubalu konstrui estrada betaun hamutuk rihun $27. Nune’e, ami esforsu halo koordenasaun fali ho fornesedór para fornese fali simente. Razaun simente sa’e ne’e negosiante Xinés sira dehan presu mina sa’e no husi Dili mai munisípiu distánsia dook. Tan ne’e, mak folin simente sa’e,” nia aktuir.
Entretantu, Diretór Servisu Munisipál Jestaun Merkadu no Turizmu (SMGMT) iha Munisípiu Vikeke, Mirandolina Fátima da Costa Guterres hateten, kona-ba folin simente parte SMGMT sei koordena ho Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P.) atu kontrola presu simente ne’ebé agora sa’e ne’e.
“Ba simente ami labele kontrola, maibé ita sei relata ba AIFAESA mak sei mai kontrola iha merkadu sira iha Munisípiu Vikeke,” nia hato’o.
Tuir observasaun TATOLI nota katak iha loja ne’ebé fa’an simente hanesan loja EANYUNGLIN, Lda simente saka ida fa’an bá $6.00 no mós loja Xineza sira seluk iha parte Beloi folin sa’e hotu ona bá $6.00.
Jornalista: Vitorino Lopes da Costa
Editór: Xisto Freitas da Piedade
