Top

Lideransa ezekutivu organizasaun Nukleu Ativista-PUDD demite konsilleiru na’in-haat

Nukleu ativista-PUDD nu'udar organizasaun filiada partidu PUDD hala'o konferénsia iha sede partidu PUDD, Palapasu Dili, kinta (21/07). Imajen Tatoli/Imajen Nelson.

DILI, 21 jullu 2022 (TATOLI)- Porta-vós no Órgaun Feto Nukleu Ativista Partidu Unidade Dezenvolvimentu Demokrátiku (PUDD), Angela Maria Fátima Rangel Freitas, deklara lideransa ezekutivu organizasaun hasai ona desizaun halo demisaun ba konselleiru na’in-haat.

Notísia Relevante: PUDD verifika estrutura hasoru Eleisaun Parlamentár 2023

Nukleu ativista-PUDD nu’udar organizasaun filiada partidu PUDD nian ne’ebé halibur timoroan tomak ho nia vizaun no misaun rasik atu hatutan hikas prinsípiu no valór partidu nian, no tuir estatutu organizasaun filiadu Nukleu ativista-PUDD ne’ebé mak hatu’ur iha artigu 5 numeru 1 define momoos katak Nukleu ativista-PUDD hanesan organizasaun filiada ida-ne’ebe kaer metin prinsípiu partidu nian.

“Ohin loron, ho polémika ne’ebé mak PUDD enfrenta, tanba polémika ne’ebé mak iha kauza hosi konsilleiru Nukleu ativista-PUDD sira, liu-liu Prezidente  Konsileiru, Eldino Maria Freitas ho ninia ambisaun no la obedese ba desizaun partidu nian,” Porta-vós, Angela Maria Fátima Rangel Freitas, deklara ba jornalista sira liu hosi konferénsia imprensa ne’ebé realiza iha sede PUDD Palápasu, kinta ne’e.

Ho atitude konsileiru sira-nian hodi afeta mós ba organizasaun Nukleu Ativista-PUDD nia ezisténsia  iha partidu  nia laran, tanba partidu lakon ona konfiansa ba organizasaun.

Atitude Konsilleiru sira-nian kontra makaas ba prinsípiu no valór organizasaun Nukleu Aktivista PUDD nian, tanba durante ne’e Konsilleiru sira liu-liu, Eldino Maria Freitas halo desizaun tuir ninia hakarak sein konsultasaun hosi lideransa ezekutivu tuir estatutu haruka.

“Relasiona ho aktu sira ne’e leten ami lideransa ezekutivu halo enkontru extra-ordinária iha loron 14 fulan-jullu 2022 hodi halo demisaun ba Konsilleiru nain-haat mak hanesan, Eldino Maria Freitas, Sebastião da Costa, Zeferino Ximenes no Eliza Maria, hodi halo fali deliberasaun  ba konsilleiru másimu foun,” nia dehan

Deliberasaun ne’ebé mak organizasaun halo bazea ba artigu 20 númeru 3 sita momoos katak lidér no membru hotu-hotu ne’ebé mak la obedese ba regra no estatutu haruka sei halakon ninia kargu ne’ ebé asume no sei halo deliberasaun ba membru seluk.

Tamba ne’e, organizasaun halo kedas desizaun hodi halo demisaun ba konsilleiru na’in-haat ne’e no halo fali deliberasaun foun ba konsilleiru másimu Nukleu ativista-PUDD.

Porta-vós ne’e lori lideransa ezekutivu organizasaun filiadu Nukleu Aktivista-PUDD hakarak apela ba kuadru, militante no simpatizante tomak katak labele konsidera ona ba konsilleiru na’in-haat ne’e tanba organizasaun halo ona demisaun hosi sira-nia kargu nu’udar konsilleiru.

“Husu ba kuadru, militante no simpatizante tomak nafatin kalma no husu ita hotu hahú hosi lideransa superiór to’o militante atu obedese ba desizaun partidu no desizaun organizasaun nian no labele monu ba individu ka grupu ki’ik ne’ebé mak ho sira-nia ambisaun hodi halo polítika  iha ita-boot sira leet,” nia apela.

Nia mós husu ba kuadru, membru no militante tomak atu nafatin servisu hodi haboot no habelar organizasaun Nukleu Aktivista PUDD ba timoroan tomak.

Hatán ba kestaun ne’e, liuhosi telefónika, Adjuntu Konsilleiru Nukleu-Ativista PUDD, Zeferino Ximenes, klarifika katak desizaun demisaun ne’e laloos tanba sira lahetene problema nia hun tanba saida ezonera sira.

“Demisaun ne’e la loos, tanba sira mós durante nunka fó informasaun problema tanba saida mak ezonera ami ne’e ami lahatene. Sira dehan desizaun ne’ebé ami fó la obedese ba partidu ne’e la loos tanba durante atividade ami mak hala’o no obedese nafatin ba desizaun superiór ninian,” nia klarifika.

Nia konsidera ho deklarasaun konferénsia imprensa ne’e la konsidera ba konselleiru sira, nune’e iha tempu badak sei komunika ho konselleiru sira seluk sei hato’o klarifikasaun hodi hatán ba prepkupasaun ida-ne’e.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!