HEADLINE, MUNISÍPIU, VIQUEQUE

MAE inaugura sede suku Uani-uma Viqueque

MAE inaugura sede suku Uani-uma Viqueque

Inaugurasaun sede suku uani-uma, kinta (21/07). Imajen Tatoli/Vitorino Lopes da Costa

VIQUEQUE, 21 jullu 2022 (TATOLI)–Ministru Administrasaun Estatál (MAE), Miguel Pereira de Carvalho, kinta ne’e, inaugura sede suku Uani-uma, postu administrativu Uatucarbau, munisípiu Viqueque.

“Ita reabilita sede suku Uani-uma, liuhosi Programa Dezenvolvimentu Nasionál Suku (PNDS) ida. Sede suku importante ba líder komunitáriu sira hodi uza halo atendimentu ba ita-nia komunidade. Tanba ne’e, ita presiza halo reabilitasaun atu líder komunitariu sira bele utiliza,” Ministru hateten ba jornalista sira, hafoin ramata halo inaugurasaun sede suku Uani-uma, kinta ne’e.

Notísia relevante: MAE entrega UKL ba benefisiáriu iha Uatucarbau

Iha tinan-rua nia laran PNDS reabilita sede suku hamutuk 400 iha Timor laran tomak no tama fulan-dezembru finaliza hotu ona. Nune’e, iha tinan 2023, Governu sei halo reabiliasaun ba sede suku hamutuk 52.

“Liuhosi reabilitasaun ne’e, ita-nia líder sira bele uza. Ha’u sente xefe suku sira iha Uatucarbau bele uza fasilidade sira-ne’e hodi fó atendimentu ba komunidade. Ezemplu halo atendimentu ba rejistu fixa família, pagamentu idozu no pagamentu subsídiu familiár ne’ebé tinan ida-ne’e ita sei implementa,” nia akresenta.

Tuir dadus, sede suku hamutuk 452 no aldeia 233 mak sai atensaun ba Governu hodi tau-matan.

Iha fatin hanesan, Xefe suku Uani-uma, António de Jesus, haktuir, suku ne’e iha aldeia lima ho uma-kain hamutuk 260, ho ninia abitante hamutuk 1.325, kompostu hosi mane 652 no feto 673.

“Agora ami bele halo atendimentu ba ami-nia komunidade ne’ebé maka presiza dokumentu ruma. Tanba sede suku uluk ho kondisaun grave, maibé agora Governu reabilita ona ami-nia sede suku no iha mós fasilidade komputadór hodi atende komunidade,” nia agradese.

Reabilitasaun sede suku Uani-uma ho totál orsamentu hamutuk $13.315 no hahú halo reabilitasaun iha tinan 2021.

Serimónia inaugurasaun sede suku ne’e partisipa hosi Administradór munisípiu Viqueque, Januário Soares ‘Bolly’, Administradór postu Uatucarbau, Direjente PNDS no Xefe suku inklui komunidade lokál.

Jornalista   : Vitorino Lopes da Costa

Editora        : Julia Chatarina

iklan
iklan

Leave a Reply

iklan
error: Content is protected !!