BOBONARO, 21 jullu 2022 (TATOLI) – Preizdente Autóridade Munisípiu Bobonaro, Ernesto de Oliveira Barreto, husu komunidade sira hotu ne’ebé sai traballadór ba Programa Mão de Obra Postu Administrativu (PMOPA) atu serbisu ho loloos iha impementasau faze dahuluk iha tinan fiskál 2022 ne’ebé sei realiza iha tempu badak.
“Ha’u husu karik serbisu tenke ho neon ho laran, lere duut iha dalan-ninin karik, tenke ho loloos, labele lere iha leten masi kraik nafatin hela deit,ne’e labele ida,ita tenke servisu la presiza ema mak haruka ita tenke halo hansane,halo hanesan,ita nain rasik mak halo tanba ne’e di’ak ba ita-nia suku,” nia hateten iha kna’ar-fatin, Maliana, kinta ne’e.
Notísia relevante: Governu aloka rihun $698-resin implementa PMOPA iha Bobonaro
Programa ne’e governu implementa hodi kapasita komunidade, empodera no hakbiit rekuperasaun ekonomia liuhosi atividade limpeza iha estrada rurál no urbana, hamoos valeta, aterru no taka estrada ku’ak hodi fasilita movimentasaun transporte públiku no atividade ekonomia.
Nia apela ba administradór postu, xefe suku, xefe aldeia sira fó kontribuisaun másimu hodi orienta no motiva traballadór sira badinas serbisu tanba programa governu ne’e benifísia ba povu hodi hakbiit ekonomia família no halo ambiente moos no saudável.
“Ami reuniaun ona ho ministériu, sira fó-sai iha Same ninia ne’e kapas tebes, ne’e duni ita nu’udar ema katuas, ferik tenke halo buat ne’ebé didi’ak ho loloos, depois ha’u husu serbisu PMOPA ne’e tenke hotu tuir data terminadu,” nia fó hanoin.
Enkuantu Ministeriu Administrasaun Estatál, aloka orsamentu hamutuk $698.497,98 hosi Orsamentu Jerál estadu (OJE) 2022 ba autoridade munisípiu Bobonaro hodi implementa programa ne’e iha postu administrativu neen suku 50.
Xefe suku Ritabou, postu administrativu Maliana, munisípiu Bobonaro, Maximiano dos Santos Araújo, agradese ba polítika VIII Governu Konstituisionál tanba iha inisiativa di’ak hodi kontinua implementa programa ne’e kada tinan.
“Ha’u hanoin programa ne’e di’ak tebes tanba fó serbisu ba ita-nia komunidade, liuliu joven sira-ne’ebé oras ne’e halimar hela,” nia hateten.
Notísia relevante: MAE sosializa matadalan implementasaun PMOPA autoridade sira iha Viqueque
Jornalista : Sérgio da Cruz
Editór : Evaristo Soares Martins
