DILI, 21 jullu 2022 (TATOLI)—Diretór Serviso Munisipál Agua Saneamentu no Ambiente, Hermínio Moniz Ribeiro, informa daudaun ne’e Autoridade Munisípiu Dili (AMD) iha pesoál saneamentu na’in-24 mak halo limpeza iha jardin sira iha Dilli.
“Agora daudaun ita-nia pesoál hamutuk 24 mak halo hela limpeza iha jardin sira iha kapitál. Hosi númeru ne’e, balun reforsa hamoos fali estrada nian,” Hermínio Moniz Ribeiro hateten ba Tatoli iha nia knaar fatin, Dili.
Tuir nia, Servisu Munisipál Agua Saneamentu no Ambiente daudaun ne’e halo kontrolu ba jardin sira. “Ami nafatin kontrola jardin sira-ne’ebé duut naruk, ami-nia pesoál sira sempre iha ne’ebá hodi lere duut sira iha jardin. Parese observasaun iha jardin balun mak ami seidauk tesi duut sira, maibé ami-nia planu jardin sira ami sei haamoos no sei tesi duut nafatin inklui hamoos no raut lixu sira iha jardin laran,” nia dehan.
Daudaun ne’e, Admiisstrasauan Munisípiu Dili falta pesoál saneamenntu atu hamoos iha jardin sira, tanba pesoál balun tenke reforsa fali hodi hamoos estrada ninin, maibé sira nafatin tesi duut no raut liixu ha jardin sira iha kapitál.
Maibé, nia dehan, iha fatin balun mak haree seidauk hamoos, ne’e signifika fatin balun seidauk ne’e mak iha observasaun públiku nian katak jardin sira-ne’e seidauk iha tratamentu,” nia dehan.
Maske nune’e, ba jestór iha jardin sira aleinde postu administrativu sira rekruta pesoál hodi haree jardin, Serviso Munisipál Agua Saneamentu no Ambiente (SMASA) mós iha nia pesoál hodi haree ba jardin sira iha Dili hamutuk 13-resin.
Iha fatin seluk, Administradór Postu Administrativu Vera Crúz, Manuel Gusmão, hateten ba Postu Administrativu Vera Crúz iha pesoál saneamentu hamutuk 20 mak daudaun ne’e halo limpeza iha jardin kapitál.
“Ami tenke muda sira tanba foer barak loos, entaun sira-ne’e la permanente iha jardin sira. Tanba, ita koloka mós sira hamos iha estrada boot, hanesan hamoos hosi Balide tun ba Caicoli no Motael, entaun ho 20 pesoál de’it ami araska loos atu tau sira permanente iha fatin ida,” nia esplika.
Se tau permanente iha fatin ida, ida ne’e prejudika fali foer iha fatin seluk tanba iha jardin sira loron-kalan ema sempre mai tuur hoodi buka anin mataak no hosi ne’e foer mós barak iha ne’ebá.
“Ita hatene iha jardin ne’e kuaze loron kalan ema tur iha ne’ebá, depois so’e nasi kotak, plástiku no masa mamuk sira, ho ida-ne’e dala ruma ema la to’o atu ami tau sira permanente iha jardin sira. Maibé, ami nafatin orienta sira atu hamos foer sira iha jardin,” nia dehan.
Entretantu, pesoál saneamentu na’in-24 ne’e, sira-nia durasaun servisu fulan sia (9) ba halo limpeza jardin sira. “Sira-nia durasaun servisu ita halo kontratu ho sira to’o fulan sia, ne’ebé hahú hosi fulan abríl to’o dezembru tinan ne’e. Ho atividade limpeza ne’e kada pesoál simu orsamentu hamutuk $115,” nia informa.
Jornalista : Nelia Fernandes
Editór : Cancio Fernandes
