DILI, 22 Maiu 2026 (TATOLI)—Administradór Postu-Administrativu Maubisse, Joaquim Salsinha Soares, informa akontesimentu erozaun iha Suku Fatubesi, Postu Administrativu Turiskai, Munisípiu Ainaru ne’e, Autoridade Maubise no Protesaun Sivíl (APC, sigla portugés) Ainaru evakua ona komunidade afetadu na’in-15 iha fatin seguru.
Administradór Postu Administrativu Maubise, Joaquin Salsinha Soares, informa katak tuir informasaun sira husi komunidade katak erozaun ne’e akontese iha loron 21 fulan-Maiu tinan 2026, iha dadersan tuku 04h00, madrugada.
“Ami haruka ona komunidade sees ona husi fatin ne’ebá liuliu tuir identifikasaun iha uma-ka’in 15 mak hetan ameasadu, maibé ita evakua ona sira hodi hela iha komunidade seluk nia uma,” dministradór Postu Administrativu Maubise, Joaquin Salsinha Soares, hateten ba Agência Tatoli liuhusi telefónika, ohin.
Nia informa, totál komunidade ne’ebé hela besik iha fatin akontesimentu ne’e seidauk klaru maibé provizoriamente iha na’in-70.
“Erozaun ne’e fó ameasa maka’as ba komunidade, nune’e ami evakua ona komunidade tanba horikalan mós ekipa APC munisípiu Ainaru no Aileu tuun direta iha terenu hodi halo asisténsia emerjénsia ba komunidade no agora daudaun ami kontinua halo hela monitorizasaun iha terrenu,” nia dehan.
Autoridade posstu ne’e dehan, erozaun ne’e aleinde estraga komunidade nia toos, maibé mós estraga estrada ne’ebé daudaun ne’e kompañia Montana Diak normaliza hela, entaun agora daudaun transporte labele asesu ba-mai.
“Tanba ne’e, ami ho kompania Montana Diak buka alternativa hodi kee fali dalan provizóriu husi Aldeia Ai-Hosan, Suku Maulau nian ba Fatubesi, atu komunidade sira bele halo movimentu ba-mai ho di’ak,” nia dehan.
Tanba erozaun ne’e taka tiha estrada dirasaun ne’ebé kompañia Montana Diak reabilita hela no dalan ne’e bele asesu ba suku haat hanesan Suku Edi, Suku Maulau, Suku Manetu no Manelobas inklui Postu Administrativu Turiskai.
“Erozaun ne’e ita labele fó sala (duun) ba malu sunu rai ka tesi ai arbiru, maibé ne’e natureza no foho ne’e nakonu ho fatuk no laiha ai-horis ruma, ne’ebé akontesimentu ne’e naturál, nune’e mós agora tempu udan,” nia esplika.
Jornalista : Alexandra da Costa
Editór : Cancio Ximenes
