DILI, 21 jullu 2022 (TATOLI)— Diretór Klínika Hospitál Nasionál Guido Valadares (HNGV), Marcelino Correia, informa daudaun ne’e, Vise Ministru Saúde, Bonifacio “Maucoli” dos Reis baixa iha sala Very Important Persons (VIP) HNGV tanba sofre kardiovaskular.
“Vise Minsitru, Saúde Bonifacio “Maucoli” dos Reis sofre korasaun (Kardiovaskular) desde uluk kedas, maibé hodikalan (20/07), mak hetan tan atakasaun iha munisípiu Ainaro no ohin dader, mak evakua mai HNGV hodi halo tratamentu intensivu,” Diretór Klíniku HNGV, hateten ba jornalista sira iha HNGV, kinta ne’e.
Nia hatutan, “Vise Ministru Maucoli bá munisípiu Ainaro atu selebra loron nasionál saúde ne’ebé monu iha 22 jullu ne’e. Maibé dalaruma kolen mak provoka Vise Ministru nia-fuan moras”.
Daudaun ne’e, Vise Ministru Saúde hetan tratamentu hosi médiku espesialista sira hosi kardiolojia iha sala VIP.
“Maski Vise Ministru ne’e baixa, maibé daudaun kondisaun jerál di’ak no kontinua tratamentu hela no kontinua konsumu ai-moruk no deskansa hela iha HNGV,”nia afirma.
Kona-bá transferénsia ba rai li’ur ne’e mediku sira ne’ebé haree mak sei deside se la ba entaun kontinua tratamentu iha ne’e, tanba durante ne’e Vise halo ona tratamentu saúde iha Málazia no Indonézia hodi tau kadeli ba fuan.
Entretantu, iha loron 4 novembru 2021, Vise Ministru Saúde ne’e mós baixa iha HNGV tanba sofre hipertensaun no estómogu inklui kardiovaskular.
Notísia relevante: Vise Ministru Saúde “Maucoli” baixa iha HNGV
Jornalista :Felicidade Ximenes
Editór : Florencio Miranda Ximenes
