DILI, 22 jullu 2022 (TATOLI)—Deputada hosi bankada CNRT, Carmelita Caetano Moniz, enkoraja funsionáriu no jornalista Agência TATOLI, Institutu Públiku (TATOLI, I.P) atu kontinua serbisu ho di’ak hodi transmite ka publika informasaun ne’ebé kredivél, kualidade no onestidade.
Notísia Relevante: Bankada PLP husu Agência TATOLI tenke sai mídia krítiku-independente
“Ha’u nu’udar timoroan, bankada deputada CNRT fó ha’u-nia parabéns ba Agência TATOLI, I,P. Ha’u dezeiju buat hotu di’ak ba Agência TATOLI mais dezenvolvidu hodi servi fó kontribui másima ba rai doben Timor-Leste liuhosi informasaun ne’ebé kredivél, kualidade ho onestidade, tanba povu merese hetan informasaun ne’ebé di’ak hodi hetan tan konfiansa,” Deputada CNRT, Carmelita Caetano Moniz, hateten ba Agência TATOLI, relasiona ho aniversáriu Agência TATOLI, I.P ba ba dala-neen (6) ne’ebé sei realiza iha 27 jullu tinan ne’e, iha Parlamentu Nasionál.
Tuir nia, durante ne’e konteúdu notísia sira-ne’ebé públika iha TATOLI iha duni kualidade, mezmu nune’e presiza kontinua mellora nafatin no presiza apoiu Governu nian liuhosi aumenta alokasaun orsamentu hodi dezenvolve liután mídia estatál ne’e.
“Ha’u gosta konteúdu notísia hosi TATOLI ita haree katak notísia sira iha kualidade ne’ebé durante ne’e prodús ona notísia ida-ne’ebé di’ak no kredivél ba povu. Mezmu iha buat balun tanba ita rekuñese iha difikuldade finanseira ne’ebé ladún sufisiente atu dezenvolve di’ak liután Agência Notisioza ida-ne’e,” nia dehan.
Menbru Parlamentu Nasionál ne’e mós kongratula Agência TATOLI ne’ebé públika notísia ho lian haat hanesan tetún, portugés, inglés ho Bahasa Indonesia.
“Parabéns ba Agência TATOLI tanba ita-boot sira públika notísia ho lian haat ne’ebé fasilita leitór sira atu lee no komprende tuir ida-idak nia kapasidade lingua. Parabéns ba TATOLI dala ida tan ho dezeiju. ‘all the best’ ba Agência TATOLI,” nia hateten.
Tuir nia haree, publikasaun lian haat kona-ba tetún kapaas liu no ba lian internasionál hanesan inglés, portugués tenke hadia di’ak liután hodi bele fornese informasaun ida-ne’ebé di’ak entermu linguajen di’ak no adekuadu hodi nune’e ema internasionál bele akompaña ita-nia notísia rai-laran nian ho di’ak no kompreensivél.
Deputada hosi bankada opozisaun ne’e hateten, TATOLI, I.P labele halo politizasaun ba notísia sira-ne’ebé hato’o no transmite de’it notísia ho loloos ba povu tanba povu merese hetan notísia ida loos no momoos.
“Agência TATOLI mantein ita-boot sira-nia independénsia, imparsialidade ho neutralidade iha ita-boot sira-nia lala’ok funsaun komunikasaun sosiál,” nia hateten,
Notísia Relevante: MAPKOMS konsidera produtu Agência Tatoli influénsia ona públiku
Jornalista : Nelson de Sousa
Editór : Cancio Ximenes
