iklan

HEADLINE

DEPC: Udan afeta ponte iha munisípiu lima, Becusse faze konkursu

DEPC: Udan afeta ponte iha munisípiu lima, Becusse faze konkursu

Diretór Estrada, ponte no kontrolu (DEPC, sigla portugés), Milton Ramanata de Castro Monteiro. Imajen Tatoli

DILI, 22 jullu 2022 (TATOLI) – Diretór Estrada, ponte no kontrolu (DEPC, sigla portugés), Milton Ramanata de Castro Monteiro informa ba jornalista sira katak udan ne’ebé akontese, foin lalais, estraga mós ponte balun, no altura ne’ebá, Ministru obra públika (MOP), Abel Pires, orienta kedas DEPC, hodi observa direta.

“Iha munisípiu lima mak hetan estragu hanesan iha Lospalos, Viqueque, Baucau, Manufahi no Covalima espesialmente ba ponte ne’e mak iha Viqueque ninian maibé agora dadauk ita urbaniza hela, atividade temporáriu ne’e la’o hela. Kona-ba estrutura permanente atu halo aprosimasaun fila-fali ekipa foti ona levantantamentu dadús ba iha ne’ebá,” Milton Ramanata de Castro Monteiro hateten, iha Salaun JL-Villa, Fatuhada, Dili, sesta ne’e.

Agora dadauk Becusse, tuir diretór ne’e, tama ona iha faze konkursu públiku maibé Governu fó fi’ar ekipa kompañia Timoroan (Aspalink) hodi asesu temporáriu hodi bele foti fila-fali ponte Belly Breech, hanesan ponte temporáriu ida ne’ebé iha fronteria mota-Masin, atu sobu iha ne’ebá hodi lori mai monta temporariamente iha Becusse.

Aumezmu tempu hodi hein prosesu ida atu halo fali ponte foun ne’e hodi labele prejúdika fali ema atu liu husi mota-laran. Ho nune’e, depois konkursu públiku tuir fila-fali mai sei sobu fila-fali hodi monta fali ponte foun hodi fasilita transporte atu halo movimentasaun.

“Ponte ne’e ita sobu iha ne’ebá mak lori mai tanba ida ne’ebá fásil ba ita atu sobu no depois monta fila-fali,” Diretór ne’e haktuir.

Nia akresenta, Ponte ne’ebé sai prioridade ba iha tinan ida ne’e maka ponte Kasnafar tanba Primeiru Ministru (PM) rasik tau matan tebtebes ba ponte Kasnafar liu-liu ligasaun estrada Kasnafar.

Agora dadauk iha ona konsultór ida mak halo hela dezeñu ba ponte ne’e, maibé iha hela faze atu finaliza ba dezeñu ne’e. Espera katak iha tinan ida ne’e bele finaliza no bele halo ona prosesu ba konkursu públiku hodi bele halo konstrusaun.

“Tipu ponte ne’e ita haree hanesan tonu nian ne’ebé ita sei implementa nia arku ba Obra Públika. Ami halo ona kooperasaun entre koordenasaun Estradas Pontes e Controlos ho ADN ne’ebé halo hela serbisu atu halo verifikasaun ba dokumentus balun ne’ebé presiza atu hadi’a hodi bele finaliza”.

Nia haktuir, Ponte Bilimau mós agora iha ona kompañia Salimagu mak halo hela serbisu iha ne’ebá hodi hadi’a fila-fali nia aprosimasaun ba estrada ida ne’ebé at hela ne’e. “Nune’e ekipa Obras Públicas nia Diresaun Estradas Pontes e Controlos serbisu hamutuk ho Obra Públika munisípiu Ermera nian atu tau-matan hodi halo supervizaun ba servisu ne’e”.

Diretór Estrada, ponte no kontrolu esplika, iha dokumentus, iha ponte lima inklui Samfuk iha Covalima nian no mós Maubara no tolu tan la mensiona tanba haluhan tiha hirak ne’e iha ona faze finál dezeñu nian. Bainhira dezeñu hotu ami sei submete ba ADN hodi halo verifikasaun finál, atu nune’e bainhira halo verifikasaun hotu ona sei halo kontinuasaun loke konkursu ba kompañia sira hodi halo konstrusaun fila-fali.

Dalabarak ema dehan ponte naksobu maibé ne’e laloos tanba ita haree ba ponte nia aprosimásaun entre ponte ho rai ne’ebé liga ho estrada nian.

Normalmente iha ne’e mak sempre afeta bebeik estragu ba ponte hirak ne’e, maibé ekipa ida ne’ebé mak haree liu ba konstrusaun ba dezeñu ne’ebé apropriadu tebes atu halo protesaun ba iha konstrusaun ponte entre ponte nia harii fatin ba iha aprosimasaun.

Normalmente ema dehan ponte kotu ne’e la’ós ponte mak at maibe ninia dalan koneksaun entre ponte ho nia estrada ne’e mak dalaruma konstrusaun balun ladi’ak no mós moru protesaun sira antigu ona, monu no nakfera no mós implika bee tama sobu no halo ponte kotu.

“Ami tenta nafatin elabora dezeñu sira ne’e no haree tipu konstrusaun saida mak di’ak hodi bele proteje fatin ne’e hodi bele evita fila-fali bainhira inundasaun bo’ot karik labele estraga,” nia tenik.

Ezekutivu ne’e mós relata, ponte hamutuk sanulu ne’ebé kompostu iha territóriu Timór laran ba ponte sira mensionadu; balun iha parte oeste, leste, norte, sul. “Iha ponte sanulu, ha’u la lembra sira0nia naran hotu maibé ida importánsia liu mak ida Becusse, no Kasnafar nian”.

“Tinan ida ne’e sei finaliza dezeñu sira ne’e. Espera katak finaliza sedu liután nune’e prosesa kona-ba tenderizasaun sei lalais liután tinan oin mai ita bele avansa ona ho konstrusaun,” nia espera.

Notísia relevante:Governu monta ona ponte temporáriu iha Bekusi

Jornalista: Filomeno Martins

Editór: Rafy Belo

 

iklan
iklan

Leave a Reply

iklan
error: Content is protected !!