DILI, 14 jullu 2022 (TATOLI)–Governu liuhosi Ministériu Obra Públika (MOP), hahú monta ona ponte temporáriu iha Bekusi molok sobu ponte tuan.
“Obra iha ne’ebá (Bekusi) la’o ona, preparasaun ba ponte temporáriu ne’e ninia riin rua ne’e prepara hela, hafoin sira sei ba muda ponte besi ida iha fronteira hodi monta mai iha ne’e,” Ministru Obra Públika, Abel Pires da Silva, hateten iha resintu Parlamentu Nasionál, kinta ne’e.
Notísia relevante: PM kontinua ejize MOP rezolve estragu infraestrutura impaktu dezastre naturál
Governante ne’e dehan, hafoin ida-ne’e bele rezolve ona ponte Bekusi tanba progresu fíziku kuaze 50%.
“Atu labele sakrifika tan komunidade iha área Taibesi tanba sofre inundasaun, Governu deside sobu ponte besi iha fronteira Mota Masin, munisípiu Covalima nian, hodi monta provizóriu iha Bekusi hodi sobu ponte tuan molok konstrusaun ba ponte permanente,” nia tenik.
Ponte Bekusi sobu bazeia ba orientasaun Primeiru-Ministru (PM), Taur Matan Ruak, iha tinan 2021, hafoin halo observasaun durante kalamidade iha loron 04 abril tanba ponte ne’e sai kauza ba inundasaun iha área Bekusi.
Jornalista : Antónia Gusmão
Editora : Julia Chatarina
