COVALIMA, EKONOMIA, POLÍTIKA

DTC Covalima rejistu transporte públiku 10 hetan subsídiu kombustível hosi Governu

DTC Covalima rejistu transporte públiku 10 hetan subsídiu kombustível hosi Governu

Diretòr DTC Covalima, Joaquim Gusmão. Imajen Tatoli/Celestina Teles.

COVALIMA, 22 jullu 2022 (TATOLI)–Dirasaun Transporte no Komunikasaun (DTC, sigla Portugés) Covalima hahú halo rejistu ba transporte públiku foin 10 mak atu hetan subsídiu kombustível hosi Governu Timor-Leste.

Notísia Relevaante: Governu koordena mekanizmu implementasaun subsídiu kombustível ho entidade envolvidu

“Agora daudaun, horisehik no ohin ne’e, transporte públiku 10 mak mai rejistu ona no sira-nia dokumentu kompletu, hafoin atu foti kupon ne’e mak lori mós sira-nia Anguna ho mikrolete, aprezenta hodi haree mós kareta sira-nia kondisaun, nune’e sira bele hetan subsídiu kombustível hosi Governu,” Joaquim Gusmão informa ba Agência Tatoli, iha nia kna’ar fatin, Santa Rosa, sesta ne’e.

DTC Covalima sei halo rejistu ba transporte públiku ne’ebé atu hetan subsídiu kombustível hosi Governu, hafoin remata halo rejistu mak Governu liuhosi DTC hamutuk ho kompañia fornesedór mina sei halo esplikasaun ba transporte públiku na’in sira kona-ba akordu no distribui kupon kombustivél durante ne’e halo operasaun transporte públiku hodi tula pasajeiru sira.

“Ami ho Ministériu hamutuk ho kompañia Global asina ona akordu ne’e, ami bele aplika ona fahe ona kupon kombustivél ba transporte públiku sira hanesan Anguna, Mikroleta no Bus ne’ebé rejistu ona bazea ba avizu ami fó sai,” nia hateten.

Hafoin DTC Covalima fó sai avizu no iha kuarta (20/7) to’o kinta (21/7) hahú rejistu transporte públiku hamutuk 10 ho dokumentu kompletu ne’ebé rezista ona iha DTC Covalima atu hetan kupon kombustível.

Governu apoiu subsídiu kombustível ba transporte públiku sira-ne’ebé mak durante ne’e tula pasajeiru mak bele rejistu no iha direitu hetan subsídiu ba kombustivél.

Kritériu atu rejistu hodi hetan subsídiu kombustível mak hanesan karta kondusaun validu motirista tahan ida (1), foto kopia kartaun-eleitorál na’in ba karreta, dokumentu karreta hanesan lisensa trajetu, dokumentu inspesaun validu foto kopia STNK tahan ida (1) no mós kondisaun karreta tenki di’ak.

Antes ne’e, iha loron 19 fulan-abríl tinan ne’e, eis Prezidente Repúblika Francisco Guterres Lú-Olo promulga dekretu-lei kona-ba atribuisaun subsídiu ba operadór transporte rodaviáriu públiku, aéro maritime nasionál no adkirente kombvustível ba atividade agrikola no peska.

Enkuantu iha loron 13 abríl 2022, Konsellu Ministru aprova dekretu-lei hodi hatán ba folin kombustível ne’ebé sa’e tanba efeitu hosi funu entre Ukrania no Rusia.

Jornalista : Celestina Teles

Editór        : Cancio Ximenes

iklan
iklan

Leave a Reply

iklan
error: Content is protected !!