DILI, 22 jullu 2022 (TATOLI)—Estasaun kombustível sira iha munisípiu Dili ne’ebé Governu kontratu atu atende subsídiu kombustível, hahú simu voucher hosi transporte públiku.
“Ami simu voucher hosi transporte públiku hanesan mikrolete no taxi, hahú segunda (18/07) no atende depende voucher ne’ebé sira lori mai, ezemplu balun lori voucher mai hahú $10, $20, no $50, ne’ebé ita distribui kombustível bazeia ba voucher,” Funsionáriu estasaun kombustível Mega Petroleum iha Fatuhada, Miguel Soares, hateten ba Agência Tatoli, iha Fatuhada, sesta ne’e.
Notísia relevante: Governu lansa subsídiu voucher ba transporte públiku no operadór agríkola-peska
Nia dehan, maneira simu transporte públiku ne’ebé hetan voucher ne’e, hosi tuku 06:00 to’o tuku 09:00 dadeer, nune’e fó fali oportunidade ba transporte privadu seluk no parte lorokraik mak kontinua atende fali sira.
“Ba transporte públiku ne’ebé simu kombustível iha estasaun kombustível ida, sei nafatin to’o hotu la halai bá-mai fali fatin seluk. Daudaun ne’e, transporte públiku ne’ebé lori voucher mai ne’e 500 resin ona no ita atende voucher ne’e to’o loron 31 jullu 2022,” nia akresenta.
Mega Petroleum fornese ba kada litru gazolina $1,53 no gazoleu $1,68.
Iha sorin seluk, Estasaun kombustível Mekar Fuel iha Comoro, implementa ona programa subsídiu kombustível ba transporte públiku.
“Kona-ba atendimentu, sira lori voucher ne’e mai iha laran $50, loron ida ami atende sira litru 10 de’it, restu ne’e ami halo nota fó fali ba sira hodi loron tuir mak ami enxe fali nune’e to’o hotu,” Funsionáriu estasaun kombustível Mekar Fuel, Abílio Pereira.
Iha estasaun kombustível ne’e, ba gazoleu $1,65 no gazolina $1,49, nune’e ba transporte públiku ne’ebé hetan subsídiu sira fa’an litru ida hetan $1,35 maibé atende kontratu hosi Governu, gazolina $1,73 no gazoleu $1,75.
Daudaun ne’e, transporte públiku besik 1.000 mak lori ona voucher ba Mekar Fuel.
Nune’e mós, Kondutór karreta mikrolete 010, Câncio da Silva, sente kontente tanba bele hetan subsídiu kombustível hosi Governu iha situasaun ne’ebé daudaun folin kombustível sa’e.
“Ami kontente tanba hetan ona subsídiu hosi Governu, ami hetan voucher subsídiu kombustível litru $150 maibé iha Mekar Fuel kada loron bele fó de’it litru 10, entaun ami halai karreta ami mak hasai fali osan hodi enxe tan mina, tanba litru 10 ne’e la nakonu,” nia tenik.
Mikrolete sira bainhira halo operasaun, tarifa ba kada estudante $0,15 no $0,20 no ba públiku $0,25.
Estudante Universidade Nasionál Timor-Lorosa’e, Igildo Ximenes Guterres, hateten, daudaun ne’e sira selu tarifa mikrolete ba kada diresaun $0,15.
“Antes ne’e, ba kada diresaun ida ita selu bemo $0,15 sira hirus, maibé agora ita selu $0,15 no $0,20 mós sira la hirus no simu de’it,” nia dehan.
Kada transporte públiku hetan subsídiu kombustível litru 450 ba fulan-tolu, ne’ebé kada fulan sei hetan litru 150.
Jornalista : Arminda Fonseca
Editora : Julia Chatarina
