VIQUEQUE, 22 jullu 2022 (TATOLI)--Ministru Administrasaun Estatál (MAE), Miguel Pereira de Carvalho, sesta ne’e, hamutuk ho autoridade munisípiu Viqueque, inaugura postu saúde iha iha suku Macadique, postu administrativu Uatulari, munisípiu Viqueque.
“Ohin ha’u mai halo inaugurasaun ba postu saúde iha suku Macadique liuhosi Planu Nasionál Dezenvolvimentu Suku (PNDS), kria postu saúde ida-ne’e hodi fó atendementu ba ita-nia komunidade sira iha suku ida-ne’e,” Ministru informa ba Agência Tatoli, iha postu saúde Macadique, sesta ne’e.
Notísia relevante: 2023, MS planu konstrui postu saúde 25 iha territóriu nasionál
Iha fatin hanesan, Diretora Ezekutiva Programa Nasionál Dezenvolvimentu Suku (PNDS), Claudina Soares Pinto, haktuir, konstrusaun edifísiu ne’e ho fundu reziliénsia komunitária no rekuperasaun ekonomia ne’ebé hetan hosi Governu Austrália iha tinan 2020.
“Programa ne’e implementa hosi PNDS, ne’ebé maka indika iha menu setór saúde. Ita halo kontrusaun postu saúde ne’e ho orsamentu $31.000. Orsamentu ne’e jere hosi ekipa jestaun suku Macadique hodi implementa konstrusaun postu saúde,” nia akresenta.
Nune’e mós, Xefe sentru saúde Uatulari, Valente Soares, hateten, postu saúde Macadique sei koloka pesoál saúde na’in-rua, kompostu hosi enfermeiru ida no parteira ida hodi halo atendimentu ba komunidade iha suku Macadique.
“Ha’u agradese ba PNDS ne’ebé konstrui ona postu ida-ne’e, ha’u mós husu PNDS se bele karik halo uma besik postu saúde ba pesoál saúde hodi halo atendimentu ba ita-nia komunidade,” nia rekomenda.
Postu saúde Macadique ho medida 7×8, ho fasilidade kadeira, meza no fasilidade saúde seluk maibé sei falta kama ba pasiente sira.
Tuir dadus, suku Macadique iha aldeia 21, ho totál uma-kain 1.773 no populasaun 7.482, kompostu hosi mane 3.852 no feto 3.630.
Jornalista : Vitorino Lopes da Costa
Editora : Julia Chatarina
