Top

PN husu Governu apoiu repatria traballadora timoroan na’in-hitu iha Indonézia

Prezidente Komisaun F Parlamentu Nasionál, Noé da Silva Ximenes "Buka Tuir". Imajen Tatoli/Francisco Sony

DILI, 22 jullu 2022 (TATOLI)—Membru Parlamentu Nasionál (PN) liuhosi Deputadu bankada PLP, Noé da Silva Ximenes ‘Buka Tuir’, husu Governu atu apoiu repatria traballadora feto na’in-hitu (7) iha Jakarta-Indonézia hodi fila mai Timor-Leste.

Notísia Relevante: Traballadora na’in-hitu iha Dubai hahú viajen mai Timor-Leste

Traballadór feto na’in-hitu antes ne’e ‘terus’ ka hetan problema iha Dubai, Uni Emiradu Arabé (EUA) tanba empreza ne’ebé fó-serbisu ba sira laiha kontratu no sira-nia dokumentu empreza halo apreensaun hotu.

Prosesu traballadora na’in-hitu fila mai tanba Governu Timor-Leste halo kooperasaun ho Governu Dubai, nune’e husu empreza ne’ebé fó serbisu atu hola tikete ba traballadora hirak ne’e fila mai Timor-Leste, nune’e ikus sira konsege hala’o viajen hodi Dubai mai Jakarta no daudaun iha hela iha embaisada Timor-Leste iha Jakarta, durante semana tolu ona.

“Ida-ne’e maka informasaun publiku hotu-hotu haree, rona ne’e la’ós segredu ona entantu hanesan reprezentante povu iha uma fukun  Parlamentu  Nasionál ida-ne’e husu nafatin ba Governu oinsá mak bele tau matan ba sidadaun sira-ne’e hodi fila mai Timor-Leste,” Deputadu PLP, Nóe da Silva, hateten ba Agência TATOLI iha Parlamentu Nasionál, sesta ne’e.

Governu iha responsabilidade hodi tau matan ba ninia sidadaun sira liu-liu sidadaun sira-ne’ebé hasoru problema hodi bele repatria fila mai Timor-Leste.

Deputadu hosi bankada Governu ne’e mós husu Governu atu haree tau matan mós sidadaun timoroan lubun iha Portugál ne’ebé ba ho pasaporte Timor-Leste de’it tanba tuir informasaun ne’ebé iha katak sira hetan problema.

Bibán ne’e, nia apela mós ba timoroan hotu hakarak ba servisu iha rai-li’ur presiza buka informasaun ho loloos ho ajénsia sira, nune’e ikus labele hasoru problema oioin.

Deputada CNRT, Maria Barreto, husu ajénsia ne’ebé antes ne’e haruka traballadora na’in-hitu (7) ba Dubai atu responsabiliza ba hola billete hodi lori fila-fali traballadora hirak ne’e mai Timor-Leste, tanba daudaun sira kontinua hela iha embaixada Timor-Leste iha Jakarta.

“Primeiru ha’u atu dehan katak sé mak haruka sira ba tenke responsabilidade to’o fim labele ema hetan difikuldade iha viajen nia laran no seidauk atinje ninia objetivu ida-ne’ebé nia ba depois ema haruka nia abandonadu ne’e labele. Ne’ebé, sé mak haruka ba, husu ba nia responsabiliza atu bele lori ema ne’e fila-fali mai Timor,” nia hateten.

Tanba, tuir nia, bainhira ema ba rai-li’ur só ema ne’ebé asegura mak liuhosi instituisaun Estadu. Ezemplu Governu iha kontratu ho nasaun ida-ne’e, mak foin bele haruka ba maibé se ema-ne’ebé empreza privadu haruka mak iha kestaun ne’e, nia tenke fasilita hodi fila-fali mai.

Jornalista : Nelson de Sousa

Editór      : Cancio Ximenes

Publisidade

Leave a Reply

Latest Post

error: Content is protected !!