iklan

DILI, POLÍTIKA

Tékniku komisaun F sei hadi’a formatu projetu-lei protesaun labarik

Tékniku komisaun F sei hadi’a formatu projetu-lei protesaun labarik

Labarik sira fa'an hela manu-tolun da'an iha Estasaun Kombustível MEKAR FUEL (MK) Fatuhada Dili, kuarta (20/07). Imajen Tatoli/Francisco Sony.

DILI, 22 jullu 20 22 (TATOLI)—Prezidente komisaun F trata asuntu Saúde, Seguransa Sosiál no Igualidade Jéneru iha Parlamentu Nasionál, Nóe da Silva Ximenes ‘Buka Tuir’, informa tékniku komisaun sei haree fila-fali formatu no legalidade ba projeitu-lei númeru 29/V(3a) protesaun ba labarik no foinsa’e iha perígu, molok aprezenta ba meza plenária.

Notísia Relevante: Komisaun F sei halo re-abertura ba artigu balun projetu-lei protesaun labarik

“Loloos ne’e ami aprezenta tiha ona iha fulan ida liu ba kotuk. maibé tanba kestaun tékniku haree tanba nia konteúdu iha laran kontempla iha asuntu rua hanesan ida ba labarik sira ne’ebé iha situasaun risku maibé ida fali ita kontempla situasaun jerál ba labarik sira. Entaun haree hosi títulu lei ne’e rasik ko’alia kona-ba labarik ho joven sira-ne’ebé iha situasaun risku nia laran maibé iha laran asuntu rua entaun presiza haree didi’ak. Tanba ne’e, agora daudaun ami fó hela servisu ne’e ba tékniku sira atu haree fila-fali nia formatu no legalidade hafoin sei aprezenta fali iha loron 15 setembru depois resesu hotu,” Prezidenrte Komisaun F ne’e hateten ba jornalista sira iha Parlamentu Nasionál, sesta ne’e.

Antes ne’e, komisaun aprova ona textu finál iha faze espesialidade ba projeitu lei ne’e, nune’e daudaun parte tékniku sira haree hela hein katak hafoin resesu ramata sei aprezenta ba meza Prezidente Parlamentu Nasionál hodi bele ajenda diskusaun ba iha faze espesialidade no aprovasaun finál globál.

Komisaun F iha espetativa ba projetu lei ne’e tenke aprova ona tinan ne’e, nune’e proteze labarik no joven hotu iha iha situasaun risku iha Timor-Leste.

Preámbulu hosi projetu-lei ne’e previstu kona-ba dezenvolvimentu ida ba sistema protesaun integrál ba labarik sira, nune’e impoin esforsu armonizasaun lei hotu-hotu relasaun ho promosaun no protesaun diretu ba labarik no joven iha perigu sira.

Projetu-lei ne’e iha artigu hamutuk 103 no kapítulu hamutuk XI. Kapítulu I ko’alia kona-ba dispozisaun jerál, kapítulu II ko’alia kona-ba intervensaun ba promosaun direitu sira no protesaun labarik no joven iha perigu.

Kapítulu III ko’alia kona-ba medida promosaun direitu no protesaun, kapítulu IV ko’alia kona-ba komunikasaun, kapítulu V ko’alia kona-ba intervensaun Ministériu Públiku, kapítulu VI previstu dispozisaun prosesuál jerál, kapítulu VII sita kona-ba prosedimentu urjénsia, kapítulu VIII ko’alia kona-ba prosesu iha serbisu protesaun labarik no foinsa’e no kapítulu IX ko’alia kona-ba prosesu judisiál promosaun no protesaun.

Deputadu sira-ne’ebé sai proponente ba projetu-lei ne’e mak hanesan Noé da Silva Ximenes “Buka Tuir”, António Verdiál de Sousa, Felix da Costa “Anin Buras”, Cidália Mesquita Ximenes, Maria Gorumali Barreto, Helena Martins Belo, António Nobre Tilman, Lúcia Taeki, Veneranda Lemos Martins no Ernesto Fernandes “Dudu”.

Inisiativa lejizlativa ne’e bazea ba rezolusaun Parlamentu Nasionál númeru númeru 16/2003, 30 jullu, ne’ebé Timor-Leste ratifika Konvensaun kona-ba Direitu Labarik.

Entidade sira-ne’ebé submete paresér ba projetu-lei ne’e mak hanesan ALFeLa, Asosiasaun Defisiente Timor-Leste (ADTL), Child Fund, Komisaun Nasionál Direitu Labarik, FOKUPERS, FONGTIL, JSMP, Ministériu Justisa, Ministériu Saúde, Ministériu Solidariedade Sosiál no Inkluzaun, Ministériu Públiku, no Organizasaun Internasionál ba Traballu (OIT), Parlamentu Foinsa’e, Plan International, PDHJ no UNICEF.

Iha 20 setembru 2021, Parlamentu Nasionál aprova ona projetu-lei ne’e iha faze jeneralidade ho votu a-favór 54, kontra 0 no abstensaun ida (1).

Notísia Relevante: INDDICA husu PN reajenda-aprova lalais projetu-lei protesaun labarik

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!