DILI, 22 jullu 2022 (TATOLI)—Jerente Programa Planeamentu no Parseria Institutu Nasionál Dezenvolvimentu Mão de Obra (INDMO), Jaquelina de Aitara Sarmento, informa iha trimestre daruak ne’e INDMO ezekuta ona verba Orsamentu Jerál Estadu (OJE) 2022 atinje ona 43.23%.
Notísia Relevante: OJE 2022: INDMO ezekuta ona 25,23% iha trimestre dahuluk
“Iha trimestre daruak, hahú hosi janeiru to’o juñu tinan ne’e, Institutu Nasionál Dezenvolvimentu Mão de Obra (INDMO) ezekuta OJE 2022 atinje ona 43.23% ne’ebé ekivalente ho osan hamutuk $497,529.00,” Jaquelina de Aitara Sarmento informa ba Agência Tatoli, iha nia knar fatin, Díli, sesta ne’e.
Hosi montante orsamentu $497,529.00 ne’e, ezekuta ba kategória rua (2) ne’ebé kompostu hosi saláriu no vensimentu ho nia ezekusaun 46.61% ho nia saldo $127,167.00 no bens servisu ho nia ezekusaun 42.07% ho nia saldo $370,362.00.
Razaun Institutu Nasionál Dezenvolvimentu Mão de Obra (INDMO) foin ezekuta 43.23%, tanba iha pagamentu balun tarde, liu-liu iha parte konsultan sira-nian ne’ebé daudaun ne’e sira enkontru hela ho revizasaun ba kualifikasaun sira-ne’ebé iha.
“Entaun liuhosi konsultan sira-ne’e, bainhira asina kontratu ami la halo pagamentu hotu kedas. Maibé, haree ba sira-nia servisu, bainhira sira-nia servisu atinje meta ne’ebé iha mak ami foin halo pagamentu ba sira. Ho ida-ne’e mak halo ami-nia ezekusaun sa’e nune’e, tanba ami selu sira bazea ba sira-nia rezultadu servisu,” nia dehan.
Maske nune’e, nia esplika, hosi ezekusaun OJE 2022 ba iha trimestre daruak ne’e, INDMO la hasoru difikuldade tanba INDMO implementa tuir alvu ne’ebé iha.
Entretantu, iha portál transferénsia Orsamentu Jerál Estradu (OJE) 2022 Institutu Nasionál Dezenvolvimentu Mão de Obra (INDMO) nia orsamentu 2022 hamutuk $497,529.00 ne’ebé ezekuta ona 49.1%.
Jornalista : Nelia Fernandes
Editór : Cancio Ximenes
