DILI, 25 jullu 2022 (TATOLI)—Prezidente Repúblika (PR), José Ramos Horta, hateten Estadu Timor-Leste no Indonézia la ko’alia kona-ba oinsá buka tuir saudozu Prezidente Nicolau Lobato no saudozu sira seluk nia ruin tanba asuntu ne’e presiza trata ho dignu no tempu ruma sei rezolve kestaun ne’e.
Notísia Relevante: Mandati: Tempu ona Governu buka-tuir saudozu Nicolau Lobato nia ruin
Xefe Estadu ne’e hateten, asuntu ne’e iha rai-laran durante ne’e sempre ko’alia beibeik oinsá Estadu Timor-Leste buka aproxima ho Indonézia hodi buka tuir saudozu Prezidente Nicolau Lobato no saudozu hirak seluk nia nia ruin hodi bele haloot no fó onra liután.
“Buat balun ha’u lakohi ko’alia iha públiku tanba buat ne’e prosesu tenke trata ho diskrisaun ho dignidade. Laiha problema, iha tempu ruma ita sei rezolve saudozu Nicolau Lobato no saudozu sira eluk nia restu mortál sira-ne’e. Dalaruma buat lala’ok iha rai laran ko’alia demais, entaun ha’u-nia staf no Governu nia staf ami haree situasaun ne’e sei la’o no la haluha ita-nia erói. Tempu to’o ona lori saudozu Prezidente Nicolau Lobato no saudozu sira seluk sira nia restu mortál mai haloot iha rai doben ida-ne’e,” Prezidente Repúblika hateten ba jornalista sira liuhosi konferénsia imprensa iha sala VIP Aeroportu Internasionál Prezidente Nicolau Lobato, Comoro, Dili,
Iha vizita Estadu ba Indonézia ne’e, Laureadu Prémiu Nobel da Paz ne’e hateten, Estadu Timor-Leste hamutuk ho Estadu Indonézia la ko’alia kona-ba oinsa buka tuir saudozu Prezidente Nicolau Lobato ho saudozu sira seluk nia ruin tanba ninia prosesu tenke trata ho diskrisaun ho dignidade.
Notísia Relevante: PN kontinua ejize Governu buka-tuir Nicolau Lobato nia ruin
Jornalista : Nelson de Sousa
Editór : Cancio Ximenes
