BOBONARO, HEADLINE, MUNISÍPIU, SAÚDE

INS realiza formasaun asisténsia saúde inkluziva iha Bobonaro

INS realiza formasaun asisténsia saúde inkluziva iha Bobonaro

Institutu Nasionál Saúde (INS), realiza formasaun estandarizasaun asisténsia saúde inkluziva ba pesoál saude sira iha munisípiu Bobonaro. Imajen Tatoli/Sérgio da Cruz.

BOBONARO, 25 jullu 2022 (TATOLI) – Ministériu Saúde liuhosi Institutu Nasionál Saúde (INS), segunda ne’e realiza formasaun estandarizasaun asisténsia saúde inkluziva iha munisípiu Bobonaro.

Formadór Asistensia Saúde Inkluziva, Mário José Correia Guterres, informa formasaun ne’e faze datoluk ona iha munisípiu Bobonaro ho nia alvu mak pesoál saúde sira iha ospitál referál, sentru saúde no postu saúde sira.

Atividade formasaun ne’e realiza tanba bazea ba peskiza ne’ebé Rais Hadomi Timoroan no CBN Australia halo iha tinan 2015 hatudu katak ema ho defisiénsia entrenta barreira lubuk ida iha atendimentu saúde,hanesan komunikasaun,fíziku attitude instituisionál no seluk tán.

Notísia relevante: USAID apoia adisionál $400.000 mellora sistema saúde Timor-Leste

“Ita formasaun ne’e nia objetivu atu pesoál saúde sira hatene oituan kona-bá oinsá halo atendimentu ba ema ho defisiénsia sira, tanba iha ita-nia lei garante katak, iha saúde ne’e ita labele husik ema iha kotuk, tanba atendimentu ne’e ba ema hotu-hotu,” nia imforma ba jornalista sira, iha eis Kámara Dioseze Maliana.

Enkuantu formasaun durante loron haat ne’e foka liu matéria definisaun ba ema ho defisiénsia, maneira atendimentu, halo komunikasaun no terminolojia ne’ebé bele dignifika portadór defisiénsia sira iha sosiedade nia leet.

Nia fó ezemplu, dalabarak bolu ema ho defisiensia sira ho liafuan ne’ebé ladi’ak, hanesan bolu ema ‘bulak’ no seluk tán.

“Liafuan sira-ne’ebé aat ne’e la dignifika ema ho defisiénsia, entaun pelumenus ita uza terminolojia sira-ne’ebé mak bele dignifika ema ho defisiénsia, atu nune’e sira mós satisfáz ho komunikasaun sira-ne’ebé mk ita uza,” nia fó hanoin.

Sorin seluk, Ofisiál Saúde Publika Munisípiu Bobonaro, Gil Bernardo Viçente, reforsa asistensia saúde inkluziva ne’e importante ba pesoál saúde sira nune’e hasa’e sira-nia kualidade atendimentu.

“Ita durante ne’e iha fasiliadade saúde barak mk laiha asesbilidade ba defisiensia sira, entaun liuhosi formasaun ida-ne’e mak ita bele prepara ona fasilidade sira hanesan,eskada, rampa  nune’e defisiénsia sira bele asesu to’o fasilidade saúde,” nia tenik.

Partisipante ne’ebé partisipa iha formasaun ne’e hamutuk na’in-25 mai hosi sentru saúde Atabae, Balibo, Cailaco, Maliana, Bobonaro, Loloto’e no Hospital Referál Maliana.

Atividade formasaun Ministériu Saúde serbisu hamutuk ho Organizasaun Naun Governamentál, Parseiru Dezenvolvimentu (PHD) liuhosi HAMNASA ne’e realiza ona iha munisípiu Emera, Dili, Viqueque no Baucau. Tuir planu sei realiza mós iha munisípiu sira seluk inklui Rejiaun Administrativa Espesiál Oe-Cuse Ambeno (RAEOA).

Notísia relevante:UE-OMS apoia medikamentu esensiál  no ekipamentu saúde ba MS

Jornalista   : Sérgio da Cruz

Editór         : Evaristo Soares Martins

iklan
iklan

Leave a Reply

iklan
error: Content is protected !!