DILI, 25 jullu 2022 (TATOLI)–Prezidente Komisaun Funsaun Públiku (KFP), Faustino Cardoso, hateten, nia parte simu ona relatóriu hosi Komisaun Antí-Korrupsaun (CAC, sigla portugés) liga ho rekrutamentu guarda florestál.
“CAC halo ona investigasaun ba kazu ne’e, KFP simu ona relatóriu hosi CAC no daudaun KFP liuhosi ninia komisáriu ne’ebé haree kona-ba prosedimentu administrativu disiplina nian hahú halo analiza atu haree kona-ba situasaun ne’e,” Faustino Cardoso relata iha Rezidénsia Primeiru-Ministru, Taur Matan Ruak, Farol, segunda ne’e.
KFP serbisu hamutuk ho CAC no Provedoria Direitu Umanu no Justisa (PDHJ, sigla portugés) kona-ba situasaun iha rekrutamentu guarda florestál.
Antes ne’e, CAC identifika prosesu rekrutamentu ba guarda florestál mosu irregularidade, nune’e deside halo suspensaun.
Notísia relevante: Tinan oin, MAP planeia halo rekrutamentu ba guarda florestál na’in-50
Iha sorin seluk, Ministru Agrikultura no Peska, Pedro dos Reis, hateten, bainhira públiku hahú prosesa, CAC mós foti kedas dokumentu sira.
“CAC haruka ona karta ida mai ministériu, husu ministru nia desizaun tanba iha ne’ebá laiha indísiu krime, maibé iha ema 10 maka hakat liu fali hosi kritériu, maibé atu klarifika katak ema sira ne’e ajusta hotu iha laran tanba sira ho idade boot liu la tuir kritériu ne’ebé estabelese, ema sira ne’e ministériu uza kleur ona ho voluntáriu de’it, ema sira ne’e mak hein iha Lagoa Maubara, balun lalin bee ba rusa iha Jaco, tanba ministériu laiha osan hodi fó kontratu ba sira entaun aproveita osan ne’ebé aprovadu hosi guarda florestál nian ami ein kaixa sira ba iha lista únika. Ida-ne’e mak halo ita-nia partisipante sira tuir mós prosesu ne’e ladun kontente maibé atu hateten ema sira ne’e ami uza kleur ona no nunka fó saláriu ba sira,” governante ne’e esplika.
Nune’e, tuir Ministru bainhira CAC hetan irregularidade ba ema balun, bele fó hatene fali MAP hodi rezolve.
“Sira seluk ne’e favór aselera, tanba ami presiza tebes guarda florestál iha terrenu, no orsamentu ba ida-ne’e mós aprovadu ona. Ami sei la halo tan ona rekrutamentu foun tanba prosesu rekrutamentu la’ós fásil, ne’ebé ami kontinua ho rekrutamentu agora. Ami presiza guarda florestál na’in-180, maibé ema konkorre barak no prosesu tenki la’o,” nia dehan.
Jornalista : Antónia Gusmão
Editora : Julia Chatarina
