DILI, 10 agostu 2021 (TATOLI)—Diretór Jerál Floresta, Kafé no Planta Industriál hosi Ministériu Agrikultura no Peska (MAP), Raimundo Mau, hateten, tinan oin parte ministériu planeia halo rekrutamentu ba guarda florestál.
“Konforme kapasidade orsamentu, tinan oin buka atu rekruta tan guarda florestál hamutuk 50. Iha nesesidade halo rekrutamentu tanba daudaun foin iha guarda florestál 85, ne’ebé seidauk konsege asegura área florestál ne’ebé iha,” Diretór informa ba Agência TATOLI, iha ninia knaar fatin, MAP Comoro, tersa ne’e.
Parte ministériu durante ne’e nota katak komunidade balun laiha konsiénsia hodi sunu rai iha ai-laran luan.
“Kestaun ne’e presiza guarda florestál asegura, maibé buat hotu depende ba kapasidade orsamentu, enkuantu parte MAP preparadu halo rekrutamentu tinan oin kuandu osan sufisiente,” nia akresenta.
Iniasiativa rekrutamentu antes ne’e parte MAP planeia ona maibé seidauk konsege realiza tanba kapasidade orsamentu maka la sufisiente.
Jornalista : Natalino Costa
Editora : Julia Chatarina
