DILI, HEADLINE, POLÍTIKA

PR Horta: vizita Estadu kontinua hametin relasaun bilaterál TL-Indonézia

PR Horta: vizita Estadu kontinua hametin relasaun bilaterál TL-Indonézia

Prezidente Repúblika, José Ramos Horta. Imajen Tatoli/Francisco Sony.

DILI, 25 jullu 2022 (TATOLI)—Prezidente Repúblika (PR), José Ramos Horta, segunda ne’e, to’o hikas iha Aeroportu Internasionál Prezidente Nicolau Lobato, Comoro, Dili, ho aviaun ZET Indonésia ho marka PK-TWY hosi Kupang-NTT-Indonézia iha tuku 12h50, hafoin ramata vizita Estadu ba iha nasaun viziñu Indonézia.

Notísia Relevante: Ohin, PR Horta dezloka ba Indonézia

Primeiru-Ministru (PM), Taur Matan Ruak, akompañadu hosi membru VIII Governu konstituisionál mak simu direta Xefe Estadu bainhira tun hosi aviaun, ho formatura hosi Falintil Forsa Defeza Timor-Leste (F-FDTL).

Xefe Estadu hateten, durante hala’o vizita Estadu iha Indonézia, PR Horta ho nia omólogu Prezidente Repúblika Indonézia, Joko Widodo, hala’o enkontru bilaterál ne’ebé la’o ho forma amizade tebes hodi hametin nafatin relasau bilaterál entre Timor-Leste ho Indonézia.

“Ne’eduni tuir resposta ba konvite formal mai hosi Prezidente Repúblika Indonézia, Joko Widodo, ha’u ba ho delegasaun ho Governu, tantu ne’e Estadu nia vizita. No vizita Indonézia la’o di’ak tebe-tebes, ha’u haree Prezidente Repúblika Indonézia, Joko Widodo, akompaña di’ak situasaun ba evoluasaun iha Timor-Leste nia kontente ho ita-nia relasaun,” nia dehan.

Prezidente Repúblika Indonézia, Joko Widodo, durante enkontru bilaterál ho PR Horta ho delegasaun hato’o mós ideia foun oinsá nasaun rua ne’e bele servisu hamutuk liu-liu iha área fronteira entre nasaun rua.

“Prezidente Repúblika Indonézia aprezenta ideia ida no ha’u hanesan pesoalmente kontente loos hodi halo iha fronteira no zona fronteira ho buat ida nia bolu parke industrial, setór privadu Indonézia mak loké fábrika. Ida-ne’e iha parte rua, Governu tenke halo infraestrutura tanba estrada iha mota-ain ne’eba fronteira hanesan Fohorem aat loos tinan 20 nia laran la book, Governu sei halo no parte seluk setór privadu mak halo, tan ne’e ida-ne’e ideia di’ak loos,” nia hateten.

Aleinde ne’e iha vizita Estadu ne’e, PR Ramos Horta mós hasoru malu ho Governadór Nusa Tengara Timur (NTT) hodi ko’alia kona-ba éooperasaun oinsá dezenvolve área komersíu iha fronteira.

“Vizita ne’e Governador NTT mak konvida no Governadór NTT-Indonézia dinámiku tebes nia hakarak halo Oé-Cusse ho fronteira atu ba iha Timor Osidentál-NTT zona boot ida duty free. Hanoin ne’e mós ideia di’ak maibé ideia sira-ne’e Primeiru-Ministru ho Governu mak haree oinsá ba oin no tenke ba oin ita labele ko’alia de’it,” Horta dehan.

Laureadu Prémiu Nobel da Paz ne’e hateten, sei dezenvolve zona parke industriál iha fronteira ne’e sai mós kompromisu ninian, nune’e sei halo esforsu hodi transforma ekonomikamente zona fronteira.

Tan ne’e hotu-hotu hakaas an, buat ne’ebé ko’alia iha konsensu parte rua atu implementa, tanba Governu mak iha kompeténsia trata asuntu balun no Prezidente Repúblika hanesan embaixadór númeru ida (1) rai ne’e nian ba halo diplomásia kona-ba ideia ho sira seluk tan atu bele halo hamutuk no Governu mak halo desizaun ba implementasaun.

Prezidente Repúblika nia vizaun hanesan Governu nia vizaun bazeadu ba buat barak ne’ebé halo tiha ona tinan 20 no liu-liu tinan 10 mai oin tuir ita-nia planu estratéjiku dezenvolvimentu nasionál tanba buat balun la’o ona no tuir nia kontinuidade.

Enkuantu, iha vizita ne’e Xefe Estadu ko’alia mós ho nia ómologu no vizita sede Asean iha Jakarta hodi ko’alia kona-ba prosesu adezaun Timor-Leste nian no parte Indonézia fó apoiu makaas tebes ba Timor-Leste ninia adezaun.

“Klaru Indonézia apoiu makaas ita atu tama. Ha’u rasik sei haree ho Governu sei halo vizita rai balun iha Asean nian hodi ita bele tama durante mandatu Indonézia nian ne’e ka mandatu Malázia nian daudaun, maibé ne’e desizaun lidér Asean ka Xefe misaun Asean nian. Maibé ha’u hakarak fó parabéns ba lideransa nasionál tomak ne’ebé tinan sira nia laran la’ós hakas an de’it atu tama Asean maibé ita-nia objetivu vizaun hadi’a povu nia moris,” nia hateten.

Durante vizita PR Horta nian akompaña mós membru Governu hanesan Ministra Negósiu Estranjeiru no Kooperasaun (MNEK), Ministru Agrikultura no Peska (MAP), Minsitru Koordenadór Asuntu Ekonómiku (MKAE), Ministru Transporte no Telekomunikasaun (MTK), Ministru Turizmu Komérsiu no Indústria (MTKI), iha ne’ebé asina mós akordu kooperasaun iha área hanesan    agrikultura, transporte terrestre, patronizasaun no meterolojia no área kooperasaun komérsiu nian.

Jornalista : Nelson de Sousa

Editór      : Cancio Ximenes

iklan
iklan

Leave a Reply

iklan
error: Content is protected !!