DILI, 18 jullu 2022 (TATOLI)—Prezidente Repúblika (PR), José Ramos Horta, ho nia delegasaun, segunda ne’e, iha tuku 13h57 ho aviaun Citilink dezloka ona ba Indonésia ho rute viajen Dili-Denpasar no Denpasar-Jakarta.
Notísia Relevante: PN aprova pedidu PR Horta vizita Indonézia ho unanimidade
Iha Denpasar, Xefe Estadu José Ramos Horta ho nia delegasaun, sei simu hosi Governador Bali no sei hala’o enkontru bilaterál.
Xefe Estadu antes dezloka ba Indonézia, hala’o uluk pasa revista bo formatura membru FALINTIL-Forsa Defeza Timor-Leste iha Aeroportu Internasionál Nicolau Lobato, Comoro, Dili.
Ekipa delegasaun ne’ebé akompaña Xefe Estadu ba Indonézia ne’e mak Xefe Kaza Sivíl Palásiu Prezidensiál, Bendito Freitas, asesór balun, no hosi membru VIII GovernuKonstitusionál hanesan Ministru Agrikultura no Peska (MAP), Pedro dos Reis, Ministru Transporte no Komunikasaun (MTK), José Agostinho, Ministru Turizmu Komérsiu no Indústria (MTKI), José Lucas do Carmo da Silva.
Aleinde ne’e, iha mós reprezentante bankada parlamentár hanesan Deputada KHUNTO Olinda Guterres, Deputadu PD Mariano Assanami Sabino, Deputada Fretilin Nelia Menezes, Deputadu CNRT Patrocínio Fernandes no sira seluk, inklui reprezentante setór privadu ho mídia.
Tuir ajenda ne’ebé Agéncia Tatoli asesu hosi Palásiu Prezidente, durante vizita ne’e PR Horta sei hasoru malu ho nia ómologu Prezidente Repúblika Indonézia, Joko Widodo, halo mós palestra iha universidade tolu, hasoru malu ho eis Prezidente Repúblika Indonézia, Susilo Bambang Yudhoyono, entrevista eskluzivu ho mídia Indonézia hanesan Metro TV, Kompas TV, enkontru ho jenerál Chairman of Central Board of Nahdlatul Ulama, enkontru ho Coordinating Minister for Maritime and Investment Affairs, hasoru malu ho Sekretáriu Jenerál ASEAN.
Nune’e, durante vizita ne’e Xefe Estadu sei ko’alia asuntu hametin liután kooperasaun bilaterál entre Timor-Leste ho Indonézia, asuntu ASEAN no ajenda sira seluk tan.
Xefe Estadu ho delegasaun sei fila hikas mai Timor-Leste iha loron 25 jullu 2022 liuhosi fronteira terrestre.
Enkuantu, Primeiru-Ministru (PM), Taur Matan Ruak ho membru VIII Governu Konstitusionál balun mak akompaña Xefe Estadu, José Ramos Horta, iha aeroportu molok PR dezloka ba Indonézia
Notísia Relevante: PR Horta vizita Indonézia ko’alia kona-ba adezaun Timor-Leste ba ASEAN
Jornalista : Nelson de Sousa
Editór : Cancio Ximenes
