DILI, 26 jullu 2022 (TATOLI)—Inspetór Jerál Autoridade Inspesaun no Fiskalizasaun Atividade Ekonomia Sanitária no Alimentár, Institutu Públiku (AIFAESA, I.P), Ernesto Monteiro, hateten, durante halo fiskalizasaun ba distribuisaun Cesta Bázika faze daruak, identifika katak iha empreza balun distribui produtu ladun kualidade.
“Durante ita-nia akompañamentu ba distribuisaun Cesta Bázika faze daruak, ita identifika iha munisípiu rua maka empreza distribui produtu la kualidade. Hanesan iha Manatuto, empreza loloos tau na’an isin maibé lae no iha Bobonaro fahe koto fuhuk ona,” Inspetór Jerál AIFAESA, I.P informa iha ninia knaar fatin, Matadouro, tersa ne’e.
Nia haktuir, bainhira identifika parte empreza halo infrasaun durante distribuisaun, parte AIFAESA haruka hapara kedas.
“Hafoin akontese, empreza ko’alia ho komunidade iha Manatuto hodi troka kedas na’an no iha Bobonaro empreza ko’alia ho komunidade hodi troka fali ho mina-sona litru rua, ne’ebé problema sira ne’e rezolve hotu kedas iha terrenu,” nia akresenta.
Notísia relevante: Deputada PLP kestiona empreza fahe produtu Cesta Bázika “fuhuk” iha Bobonaro
Aleinde ne’e, Inspetór Jerál admite katak durante fiskalizaun atividade, seidauk simu keixa ruma hosi komunidade relasiona ho folin produtu sira la tuir kritéria.
“Ami-nia funsionáriu sira sura hotu sasán sira no hatudu katak folin sasán ba ema ida to’o $50 hanesan mensiona iha deretu-lei,” nia tenik.
Cesta Bázika faze daruak ne’e implementa hosi Ministériu Turizmu Komérsiu no Indústria (MTKI) no Sekretaria Estadu Kooperativa (SEKoop), hodi konvida AIFAESA identifika no monitoriza sasán ne’ebé empreza sira halo distribuisaun.
“Tuir ha’u-nia hatene, ita la’o ona munisípiu Manatuto, Liquiçá, Ermera no Bobonaro, maibé to’o agora ami-nia akompañamentu ida-ne’e loron ida de’it ba abertura, kestaun tanba programa ida-ne’e la’ós programadu hosi AIFAESA rasik maibé MTKI no SEKoop. Ami-nia monotorizasaun la’ós la másimu, maibé ne’e depende ba sira-nia proposta, ami la’o tuir de’it, entaun kona-ba iregularidade ruma mosu ami seidauk deteta,” nia esplika.
AIFAESA tun terrenu halo monitorizaun maibé la prevee osan espesífiku ba programa Cesta Bázika, tanba ne’e husu ministériu implementadór nia apoiu atubele fasilita transporte no osan deslokasaun ba funsionáriu sira durante ámbitu monitorizaun.
Jornalista : Arminda Fonseca
Editora : Julia Chatarina
