DILI, 26 jullu 2022 (TATOLI)–Profesór hamutuk 2.595 ne’ebé finaliza ona estudu nível baxarelatu iha Universidade Nasionál Timor-Lorosa’e (UNTL) tinan kotuk, to’o agora seidauk simu graduasaun tanba dadus hosi entidade responsável la hanesan.
Entidade ne’ebé haree ba kestaun ne’e mak hanesan Formação de Docentes e Profissionais da Educação de Timor-Leste (INFORDEPE), UNTL no Ministériu Ensinu Superiór Siénsia no Kultura (MESSK).
Prezidente INFORDEPE, Manuel Gomes de Araujo, hateten, nia parte hasoru malu ona ho Reitór UNTL hodi diskute kona-ba graduasaun profesór 2.595 no asina akordu hodi kontinua simu tan profesór foun iha tinan oin.
“Ita demora graduasaun ba profesór nível baxarelatu hamutuk 2.595 tanba problema iha dadus sira. Ita-nia dadus ikus entre INFORDEPE, UNTL no MESSK la hanesan, liuliu dadus kona-ba data moris no númeru estudante sira. Tanba ne’e maka prosesu graduasaun adia to’o agora,” Prezidente INFORDEPE informa iha ninia knaar fatin, Balide, tersa ne’e.
Notísia relevante: Graduasaun ba profesór baxarelatu hosi INFORDEPE iha faze diskusaun
Maski nune’e ekipa téknikua hosi MESSK halo ona ajustamentu, nune’e bainhira prosesu ne’e lais, fulan ne’e nia laran bele finaliza no inísiu agostu MESSK bele hasai ona despaixu hodi publika ona naran graduadu sira iha Jornál Repúblika, nune’e garante katak iha agostu nia laran graduasaun bele realiza ona.
“Prosesu graduasaun ba profesór sira demora tanba dadus estudante barak, tanba ne’e ministériu presiza halo verifikasaun kada dadus hafoin tenke halo transkrisaun nota graduadu sira, atu nune’e entre instituisaun tolu ne’e labele iha tan dadus diferente,” nia akresenta.
Jornalista : Tomé Amado
Editora : Julia Chatarina
