SEKoop fó formasaun bázika no estabelesimentu kooperativa ba funsionáriu MOP
DILI, 26 jullu 2022 (TATOLI)—Sekretaria Estadu Kooperativa (SEKoop, sigla portugés), tersa ne’e, fó formasaun bázika kooperativa no estabelesimentu ba funsionáriu Ministériu Obra Públiku (MOP) hamutuk 40, ba loron-lima, hahú hosi loron 26 jullu to’o 01 agostu 2022.
Sekretáriu Estadu Kooperativa, Elizário Ferreira, hateten, inisiativa ne’e estabelese kooperativa ida atu asegura benefísiu ekonómiku ba família funsionáriu MOP.
“MOP akomoda funsionáriu 1.700, entaun ita realiza formasaun ne’e atu estabelese kooperativa kréditu iha MOP, tanba bainhira sira harii ona kooperativa bele asegura sira-nia sustentabilidade inanseira ba an rasik, família no kontribui ba komunidade nia di’ak,” Sekretáriu Estadu informa iha salaun MOP, Caicoli.
Notísia relevante: Kooperativa kréditu ualu sei hetan sertifikadu apresiasaun hosi SEKoop
Durante formasaun, SEKoop fó referénsia ba funsionáriu MOP kona-ba kooperativa tanba kestaun ne’e hanesan asuntu transversál ne’ebé iha relasaun ho ministériu no asuntu ekonómiku hotu iha rai ne’e.
Tipu hosi formasaun ne’e mak kooperativa bázika, ne’ebé ko’alia kona-ba saida mak kooperativa ka identidade hanesan prinsípiu, valór no objetivu planu no programa kooperativa, inklui estatutu, rejimentu, prosesu rejistu no asegura sustentabilidade liuhosi kontabilidade bázika kooperativa.
Daudaun ne’e, kooperativa ne’ebé estabelese iha Timor-Leste hamutuk 409, kompostu hosi kooperativa kréditu 127 no kooperativa produsaun 282.
“Hosi kooperativa ne’e akomoda ema hamutuk 76.708 ho kapitál hamutuk milliaun $27,” nia akresenta.
Entre kooperativa ne’ebé eziste, kooperativa produsaun ladun avansa maibé hosi kooperativa kréditu hamutuk 127, iha 87 mak ativu di’ak, akomoda kapitál di’ak no fó kampu traballu direitu ba ema 787.
Iha fatin hanesan Ministériu Obra Públika, Abel Pires, husu ba funsionáriu 40 ne’ebé partisipa iha formasaun ne’e atu aproveita di’ak.
“Funsionáriu sira hahú moris hosi baze zero tanba ne’e mak ita presiza sente, ba ita-boot sira hotu ne’ebé mak serbisu iha ministériu ida-ne’e tenke aproveita oportunidade ne’e tanba kooperativa sei ajuda ita hahú hosi nesesidade bázika, asesu kréditu no ikus mak abitasaun,” nia fó hanoin.
MOP rasik iha funsionáriu 1.700, ne’ebé hosi númeru ne’e kada funsionáriu sira fó kontribuisaun $25 kada fulan, nune’e to’o tinan-ida bele rai ona osan hamutuk $500.000.
“Ezemplu, hosi osan sira ne’e mak kontribuisaun la’o di’ak durante tinan-lima mai, ita bele rai to’o millaun $2 resin, bele halo ona konstrusaun uma ba funsionáriu sira,” nia tenik.
Jornalista : Arminda Fonseca
Editora : Julia Chatarina
