BOBONARO, HEADLINE, MUNISÍPIU, POLÍTIKA

Autoridade Bobonaro sei fó espasu permanente ba Agência Tatoli

Autoridade Bobonaro sei fó espasu permanente ba Agência Tatoli

Prezidente Komisaun Organizadora komemorasaun 20 maiu Munisípiu Bobonaro, João Fátima do Carmo. Imajen Tatoli/Sérgio da Cruz.

BOBONARO, 27 jullu 2022 (TATOLI) – Autoridade Munisipál Bobonaro, sei fó espasu permanente ba Agência Notisioza Timor-Leste-Tatoli hodi hala’o serbisu nu’udar informasaun ofisiál Estadu nian.

“Ami mós hanoin hela katak, oinsá atu kria fatin permanente ba Agência Tatoli, atu nune’e bainhira divulga ka pasa informasaun ita sempre iha koordenasaun ba malu, tanba ne’e mak ami hanoin hela hakarak ita iha koordenasaun ne’ebé di’ak,” Sekretáriu Autoridade Munisípiu Bobonaro, João Fátima do Carmo, ko’alia ih Maliana.

Nia dehan, hateten autoridade munisípiu sei fó espasu permanente ba Agência Tatoli, atu halo serbisu hodi divulga informasaun lokál.

Biban ne’e, autoridade munisípiu ne’e parabeniza Agência Tatoli, Institutu Públiku ne’ebé selebra aniversáriu iha loron 27 fulan-jullu.

“Ha’u nu’udar autoridade hato’o parabéns ba Tatoli, tanba ho ita-boot sira-nia ezisténsia bele ona transforma informasaun sira iha autoridade, jeralmente iha munisípiu Bobonaro, buat-ne’ebé la’o no buat-ne’ebé la la’o, ita-boot sira mak sai hanesan matan, tilun ba povu Bobonaro,” nia espresa.

Sekretáriu Autoridade Munisípiu Bobonaro, observa durante ne’e nota publikasaun notísia Tatoli iha munisípiu Bobonaro, refelte duni ba situasaun reál ne’ebé mak akontese iha komunidade nia leet, liuliu kona-bá problema sosiál sira, hanesan estrada, eletrisidade, bee-moos, dezastre naturál no asidente tráfegu.

Notisia Relevante:Administradór prontu identifika rai instala sede Agência Tatoli, I.P iha Viqueque

Alende ne’e Tatoli mos sempre akompaña no públika informasaun governu sentrál no governu lokál nia no promove informasaun lokál sira kona-bá asuntu agrikultura, turzimu, saúde no seluk tán iha munisípiu ne’e.

Nia espera, ba oin Tatoli presiza aumenta tán rekursu ida ka rua iha munisípiu ne’e nune’e bele rekolla informasaun kobre postu administrativu hotu-hotu.

“Ha’u haree Bobonaro ita-boot mesak, tanba ita-nia área ne’e luan, ita mós agora tama ona autoridade, iha buat barak mak agora daudaun la’o hela iha munisípiu, to’o nível suku, aldeia, tanba ne’e presiza aumenta ema atu nune’e pelumenus kada postu ema na’in-ida, hodi bele reforsa informasaun sira iha baze,” Sekretáriu Autoridade Bobonaro ne’e fó hanoin.

Notísia relevante: PDHJ Bobonaro enkoraja Tatoli kontinua divulga informasaun kredivel ba sosiedade

TATOLI.IP nu’udar transformasaun husi ETNA (East Timor News Agency), ne’ebé depois nakfila ba ANTIL (Ajénsia Notisioza Timor-Leste). Ajénsia estadu ne’e hetan aprovasaun iha Konsellu-ministru no públika iha Jornál Repúblika iha loron 14 marsu 2016, nu’udar embriaun ho naran ANTIL.

ANTIL ne’e lansa husi Primeiru-ministru, Rui Maria de Araújo, iha loron 27 juñu 2016. Iha marsu 2017, Konsellu-ministru aprova ANTIL sai TATOLI, nu’udar ajénsia ofisiál estadu Timor-Leste nian no publika iha Jornál Repúblika. TATOLI ho nia estatutu rasik nu’udar Institutu Públiku (IP).

Objetivu primeiru estabelese ajénsia estadu Timor-Leste mak sai fontes informasaun ofisiál estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál.

Segundu mak nu’udar implementadór konstituisaun ne’ebé sai dever governu nian atu fó servisu oferesimentu informasaun ne’ebé kredivel no loos nomós sai direitu informasaun sosiedade Timor-Leste ne’ebé ne’ebé garantidu husi artigu 40 no 41 konstituisaun Timor-Leste nian.

Terseiru mak nu’udar instituisaun komunikasaun informasaun, Ajénsia TATOLI.IP la’ós de’it sai produtór informasaun maibé mós bele iha papel nu’udar “National information clearing house” ne’ebé iha tarefa fó klarifikasaun no informasaun serteza, halakon misinformasaun no disinformasaun. Bele sai nu’udar “área istória” no “eskritór istória” pátria, nasaun, sosiedade nomós nu’udar “maklibur no fornesedór informasaun públiku”.

Kuartu mak halo ajénsia notisioza TATOLI.IP nu’udar padraun minimál kompeténsia jornalístika ba jornalista Timor-Leste ne’ebé sempre bele produz produtu informasaun-kareira jornalístika ne’ebé iha kualidade tuir dinámika sosiál no nesesidade informasaun sosiedade nian.

“Fenómena no dinámika sosiál” ne’ebé “dinámika komunikasaun” ne’ebé estimula ho dezenvolvimentu teknolojia komunikasaun-informasaun lori konsekuénsia iha Timor-Leste ho paradigma  nesesidade informasaun públiku iha ne’ebé TATOLI nu’udar ajénsia notísia nasionál Timor-Leste ne’ebé la’ós de’it ezije atu bele fornese pakote informasaun iha kontextu “mainstream” maibé iha futuru bele mós obrigadu produz informasaun alternativa ho karakter “taylor made” ne’ebé propoen husi utilizadór informasaun determinada.

TATOLI nu’udar ajénsia notísia Timor-Leste ho karakter multikanál, multimedia, multiplataforma no multitarefa ne’ebé bele mós dezenvolvidu no iha funsaun nu’udar sentru produsaun filme no dokumentasaun nasaun, sentru opiniaun públiku nomós fórum informasaun públiku, sentru jestaun arkivu no dokumentu nasaun nomós sentru edukasaun-formasaun peskiza no dezenvolvimentu komunikasaun aplikada.

Funsaun oioin, papel, abilidade no feramenta komunikasaun institusionál ajénsia notisioza ne’e iha nia tempu bele fontes konsumu ba ajénsia notisioza ne’ebé posibilita ajénsia notísia Timor-Leste ne’e moris, krexe no dezenvolve nu’udar instituisaun komunikasaun ho karakter “income generate” (bele rezulta konsumidór) no la bebeik nu’udar “cost center” (sai pezu finanseiru).

TATOLI. IP nu’udar ajénsia notísia nasionál Timor-Leste ne’ebé moris, krexe, ne’ebé dezenvolve ho jestaun ne’ebé profisionál, apoiadu husi rekursu umanu ne’ebé kompetente ho apoiu saláriu minimál ne’ebé sufisiente no ho apresia kompeténsia no kapasidade nia jornalista sira halo bele sai “modelu” no “padraun indústria komunikasaun-informasaun no prátika jornalístika” futuru ne’ebé ho kualidade-dignidade nu’udar inventáriu nasionál Timor-Leste.

Jornalista   : Sérgio da Cruz

Editór         : Evaristo Saores Martins

iklan
iklan

Leave a Reply

iklan
error: Content is protected !!